Qurban aıt kúnderi Shymkenttiń jan-jaǵyna 17 beket qoıylady

ShYMKENT. QazAqparat - Shymkentte Qurban aıt merekesi kezinde qalanyń kireberisine 17 beket qoıylady, dep habarlaıdy QazAqparat qalalyq polıtsııa departamentine silteme jasap.

Shymkent qalasy bas memlekettik sanıtar dárigeriniń №29 qaýlysyna sáıkes, 31 shilde jáne 1-2 tamyz aralyǵynda Qurban aıt kúnderi birqatar shekteýler engizildi.

Osyǵan oraı Shymkent qalasynyń polıtsııa departamenti qala aýmaǵyna mal ákelýge tyıym saldy. Tek onlaın qurban shalýǵa arnalǵan maldy ǵana kirgizýge ruqsat etilgen.

Sondaı-aq osyndaı jaıttardyń aldyn alý maqsatynda Shymkent qalasynyń kireberisine 17 beket qoıyldy.

«Beket qoıýdaǵy maqsat – qoǵamdyq tártip pen jol qaýipsizdigin saqtaý. Qurban aıt merekesi kezinde koronavırýs ınfektsııasynyń taralýyna yqpal etetin buqaralyq is-sharalardyń ótkizilýine tyıym salý úshin osyndaı sheshim qabyldandy» dep túsindirdi polıtsııadan.

Qoǵamdyq tártip pen qaýipsizdikti qamtamasyz etýge jumyldyrylǵan jeke quram 30 shilde saǵat 07.00-den bastap, 2 tamyz kúni 00.00-ge deıin qyzmet atqarady.