Qurannyń jańa aýdarmasy men tápsiri oqyrmanǵa jol tartty - QMDB
Arab tilinen aýdarǵan ıslamtanýshy, QMDB naıb múftıi Ershat Ońǵarov. Qazaq tiliniń ádebı mánerimen órnektep, redaktsııalaǵan Qazaqstan Jazýshylar odaǵynyń múshesi, prozashy Nurjan Muratalıev.
«Qasıetti Quran: maǵynasy men túsiniktemeleri» atty eńbektiń tanystyrylymyna Bas múftı Naýryzbaı qajy Taǵanuly, zııaly qaýym ókilderi men din qaıratkerleri qatysty.
«Qazaqstan musylmandary dinı basqarmasy bıyl otyz jyldyǵyn atap ótýde. Bul rette kóptegen ıgi sharalar josparlanǵan. Búgingi sharanyń maqsaty - qasıetti kitabymyz Qurandy elge qazaq tilinde, qazaqtyń saltyna saı túsindirip jetkizý. Qasıetti Qurannyń aýdarmasy jáne onyń tápsiri jaryq kórip jatyr, Alla qalasa búgin qalyń oqyrmaǵa jol tartatyn bolady. Zııaly qaýym ókilderimen, din qaıratkerlerimen birge tusaýkeserin ótkizip jatyrmyz», - dedi Bas múftı.
Osy oraıda ol atalǵan eńbek jastardyń men jamaǵat úshin Qurannyń maǵynasy men tápsirin durys túsindirýge negizdelgenin atap ótti. Atap aıtqanda, oqyrmanǵa jeńil túsindirý qarastyrylǵan.
«Jastardyń destrýktıvti dinı aǵymdardyń jetegine ketý faktorlarynyń biri – Qurannyń maǵynasy men tápsirin durys túsinbeý. Keıde Quran aıattaryn tikeleı maǵynasynda túsinip jatady. Aýdarma ereksheligi – qasıetti aıattar arab tilindegi túpnusqadan aýdarylǵan, aıattardyń qazaqsha maǵynasy berilgen, aıattyń tápsiri, túsiniktemesi men tarıhy jan-jaqty jazylǵan. Súreniń qazirgi ǵylymmen baılanysy baıandalǵan, arab tilindegi aıattyń durys oqylý transkrıptsııasy berilgen», - dedi Naýryzbaı qajy Taǵanuly.
Kitap kólemi 1000 betten asady. Aýdarmashy aýdarma barysynda Mysyr, Túrkııa, Arab memleketterindegi túpnusqa qoljazbalarǵa súıene otyryp, din men dástúr sabaqtastyǵyna mán bergen.
«Aıta keter jaıt, Ershat baýyrymyz ál-Matýrıdı, án-Násáfı, ál-Jáláláın, ál-Álýsı syndy hanafı mázhabynyń ǵulama-ǵalymdary men tápsirshilerdiń kitabynan óz nusqasynan aýdaryp shyqty. Bul eńbekke birneshe jylyn sarp etti. Alla saýaptan jazsyn!», - dedi Bas múftı.
Óz kezeginde Ershat Ońǵarov on jylǵa jýyq ýaqytyn atalǵan aýdarma eńbegine bólgenin atap ótti.
«Jastardy rýhanı tárbıege jáne tereń tanym alýǵa qural bolady dep senemin. Búgingi 3 myń danamen shyǵyp otyrǵan nusqaǵa demeýshilik jasaǵan azamattarǵa alǵysymdy aıtamyn», - dedi E. Ońǵarov.