Quran kitabyn qolmen jazyp shyqqan kallıgraf Shymkenttegi eń úlken meshittiń ashylý saltanatyna qatysty
Úlken meshit «Nursát» shaǵynaýdanyndaǵy ákimshilik-iskerlik ortalyǵynda ornalasqan. Musylman jurtshylyǵy qulshylyq jasap, duǵa etetin orynǵa Seıitjan qarı Esjanulynyń esimi berildi.
Meshittiń ashylý saltanatyna Qazaqstan musylmandary dinı basqarmasynyń tóraǵasy, bas múftı Naýryzbaı qajy Taǵanuly, Shymkent ákimi Ǵabıt Syzdyqbekov, din ǵalymdary men memleket jáne qoǵam qaıratkerleri, qala turǵyndary qatysty.
Qala ákimi kópshilikke Memleket basshysynyń quttyqtaýyn jetkizip, qasıetti Qurandy qolymen jazǵan sheıh Osman Toháge syı-syıapat jasady.
Іs-shara sońynda Bas múftı jamaǵatqa ýaǵyz aıtyp, juma namazyn ótkizdi.
Elimizge belgili ustaz, ıslamtanýshy, Qurannan bes qyraǵat ıesi, hafız Ersin Ámire atalǵan meshittiń bas ımamy bolyp bekitildi.
Rýhanı ortalyq alańynyń jalpy aýmaǵy - 12 gektar. Ǵımarat alańy - 47 myń m². Nysannyń seısmotózimdiligi - 7-9 ball. Al munara bıiktigi 63 metrge jetedi. Meshittiń bas kúmbeziniń bıiktigi - 56 metr, dıametri - 45 metr.
Meshit ǵımaratynda bir mezette 12 myńǵa jýyq mináját etýshi qulshylyq jasaýǵa múmkindik bar.
Al kireberis alańda birden 10 myńǵa jýyq kelýshi jınala alady.
Erekshe atap óterligi, munda qolaısyz aýa raıynan qorǵaný úshin avtomatty túrde ashylatyn qolshatyrlar júıesi de qarastyrylǵan. Meshit ulttyq naqyshpen úılestirile otyryp klassıkalyq ıslam stılinde bezendirilgen.
Meshitte erler men áıelderge arnalǵa minájat etý orny bar. Sonymen qatar 600 orynǵa arnalǵan as berý zaly ornalasqan. 1100 adamǵa arnalǵan konferents-zaly, 100 orynǵa arnalǵan neke qııý zaly, 428 orynǵa arnalǵan kishi dáret alý orny bar.
Meshit kesheninde ıslam tarıhynyń murajaıy, áıelderge arnalǵan oqý orny, medrese, kitap oqıtyn zaly bar kitaphanalar ornalasqan. Sonymen qatar ákimshilik bólmeler, teleortalyq, fıtnes ortalyq pen ashana da qarastyrylǵan. 736 orynǵa arnalǵan jerasty parkıngi de jumys istep tur. Meshit aınalasynda jasyl baqtar men saıabaq alleıasy ornalasqan. Kógaldandyrýdyń jalpy aýmaǵy — 4 gektar.
Meshit qurylysynyń ıdeıasyn usynýshy - «SAÝTS-OIL» kompanııasynyń basshysy Serikjan Seıitjanuly.
Seıitjan qarı Esjanuly atyndaǵy úlken meshitke Serikjan Seıitjanulynyń ákesiniń aty berilgen.
Aıta keteıik, Seıtjanovtar áýleti Forbes.kz tizimine engen eń baı 75 qazaqstandyqtyń ishinde 20-orynda.