Qýraǵan shópten 9 úı janyp ketti: Petropavl ákimi sógis aldy

PETROPAVL. QazAqparat – Petropavl ákimi jaqynda bolǵan órtte 9 baspananyń janyp ketýine baılanysty sógis aldy, dep habarlaıdy QazAqparat tilshisi.

Soltústik Qazaqstan oblysy ákimdigi apparatynyń otyrysynda Petropavl qalasynyń ákimi Rýslan Ańbaev sógis aldy. Oǵan negiz – órttiń aldyn alýda tıisti jumystyń jasalmaýy. Máselen, qýraǵan shópti shaýyp, joıý úshin bıýdjetten jylda qarajat bólinedi. Bıyl osy maqsatqa 67 mln teńge josparlanǵan, alaıda tıisti jumys júrgizilmegen.

«Qala ákimi jumysty durys uıymdastyrmaǵan. Qýraǵan shóp-qamys der kezinde shabylmaǵan. Osyndaı jaýapsyzdyqtan turǵyndar baspanasyz qaldy. Bar múlkinen, qujattarynan aıyryldy. Munyń aldyn alýǵa bolar edi, eger de tıisti jumys ýaqytynda júrgizilse. Arnaıy qarjy bólinbese, aqsha bolmasa men túsiner edim», - dedi oblys ákimi Aıdarbek Saparov.

Esterińizge salaıyq, 7 mamyr kúni Petropavldaǵy Bereke yqsham aýdanynda qamys janyp, arty aýqymdy órtke ulasty.

Sol kúni qatty jel turyp, tilsiz jaýdy aýyzdyqtaýǵa úsh saǵat ýaqyt ketti. 9 úı kúlge aınaldy, taǵy ekeýine zaqym keldi, olar turýǵa jaramaıdy. Saldarynan 11 otbasy baspanasyz qaldy.

Osy oqıǵaǵa qatysty Petropavlda jergilikti aýqymda tehnogendik sıpattaǵy tótenshe jaǵdaı rejımi engizildi. Bul dalada qalǵan otbasylarǵa QR zańnamasy aıasynda keltirilgen shyǵyndy qysqa merzimde óteý úshin engizilip otyr.

Qazirgi ýaqytta órtten zardap shekkender ýaqytsha baspanada turyp jatyr.

Táýelsiz sarapshylar turǵyndarǵa keltirilgen materıaldyq shyǵynnyń mólsherin eseptep jatyr. Sondaı-aq baspana ıelerine 100 AEK mólsherinde ótemaqy da berilmek.