Kúnsulý Zákarııa vaktsına jasaýǵa nege ınaktıvtendirý tehnologııasy qoldanylǵanyn túsindirdi

NUR-SULTAN. QazAqparat – QazVac vaktsınasyn jasaýda QR Bilim jáne ǵylym mınıstri Ashat Aımaǵambetovtyń eńbegi zor. Bul týraly QazVac vaktsınasyn jasaýshy ǵylymı toptyń jetekshisi, Bıologııalyq qaýipsizdik problemalary ǵylymı-zertteý ınstıtýtynyń bas dırektory Kúnsulý Zákarııa «Habar 24» telearnasynan beriletin «Anyǵyn aıtqanda» baǵdarlamasynda aıtty, dep habarlaıdy QazAqparat.

«2020 jyldyń 9 mamyrynda biz otandyq vaktsınany alyp, Dúnıejúzilik densaýlyq uıymyna dáleldep, kórsettik. Osylaısha QazVac DDSU-nyń tirkeýine kandıdat vaktsına bolyp kirdi. Sol kezde bizge Bilim jáne ǵylym mınıstrligi úlken kómek berdi. Ashat Qanatuly (Aımaǵambetov – red.) Ǵylym komıtetine tapsyrma berip, arnaıy ǵylymı tehnıkalyq baǵdarlama usyndy. Ol ne degen sóz? Baǵdarlama usynylǵan kezde qarjy beriledi. Jańaǵy vaktsınany jasaý úshin, ony ári qaraı testilep, saraptaý úshin qarjy kerek. Ol úshin óte kóp reaktıv, materıal, qural-jabdyq qajet. Qural-jabdyqqa bólek aqsha berildi. Sondyqtan da biz jazdyń ortasynda vaktsına jasaýǵa tolyq daıyn turdyq. Bilim jáne ǵylym mınıstri búkil múmkindikti jasaǵan bolatyn», -dedi ǵalym.

Ol sondaı-aq, QazVac platformasyna nege ınaktıvtendirý tehnologııasyn paıdalanylǵanyn túsindirdi.

«Bizdiń ınstıtýt ǵalymdarynyń eń negizgi tájirıbesi – ınaktıvtelgen vaktsına shyǵarý. Nege deseńiz, ınaktıvtelgen vaktsınany adamzat 60 jyldam astam ýaqyt boıy paıdalanyp keledi. Tehnologııasy ábden zerttelgen jáne soǵan uqsas vaktsınalardy buryn da shyǵarǵanbyz. Tehnologııanyń ózi 9 satydan turady. Eń negizgisi – jasýsha ósirý. Jasýsha – vırýstyń qoregi. Eń birinshi jasýsha ósiriledi. Jasýshanyń ústinde vırýs ósedi. Vırýs óskennen keıin ony 4 kezeńmen tazartady. Ári qaraı vırýsty óltiredi. Óıtkeni bizde ınaktıvtelgen vaktsınaǵa vırýs óltirilip paıdalanylady. Odan keıin balk-prodýkt jasalady. Ol ónim kelesi satyǵa túsedi»,- dedi maman.