Kúnine sheteldikterdiń 3-3,5 myń ótinimi qaralady – Almatynyń Halyqqa qyzmet kórsetý ortalyǵy
Onyń aıtýynsha, búginde jumysy kúsheıtilgen Halyqqa qyzmet kórsetý ortalyqtarynda jumys qarqyndy.
«Jetisý aýdanynyń ákimdigi sport-saýyqtyrý kesheni ǵımaratyn tegin berip otyr. Osynda 40-tan asa jumys ornyn uıymdastyryp, qyzmet kórsetip jatyrmyz. JSN-di kez kelgen shetel azamaty bıznes júrgizý jáne qarjylyq operatsııalyq protsester úshin alatynyn bilesizder. Bizde kúnine sheteldikterden túsetin 3-3,5 myń ótinim qaralady. Bul ádettegi júktemeden 50 paıyzǵa kóp. Sondyqtan, júktemeni azaıtý maqsatynda, JSN alý tásilderi qarastyrylýda. Fılıal basshylyǵy, Іshki qaýipsizdik qyzmeti da osynda. Kóshi-qon qyzmetiniń mamandary da reseılikterge keńes berip otyr. Qujattardy aýdarý, notarıaldy kýalandyrý qyzmeti de uıymdastyrylǵan»,- dedi ol.
Spıker HQO-ǵa kezekti aldyna ala brondaýǵa bolatynyn eske saldy.
«HQO-ǵa kezekti aldyn ala «Mobıldi HQO» qosymshasy, eGovmobile, egovkzbot2.0 Telegram-bot, eGov elektrondyq úkimet portaly jáne biryńǵaı baılanys ortalyǵynyń 1414 nómiri arqyly brondaýǵa bolady. HQO-da kezekti brondaý úshin elektrondyq úkimet portalynyń basty betinde «Sheteldikter úshin HQO-da kezekti brondaý» qyzmetin tańdaý, jeke basyn kýálandyratyn qujattyń nómirin engizý, mekemeniń ataýyn kórsetý qajet. HQO, kelý maqsaty, kúni men ýaqyty toltyrylady. Sátti brondaý kezinde sheteldik azamat kórsetilgen ýaqyttan 15 mınýt buryn HQO-ǵa kelip, kezek talonyn alady», - dedi A.Kýldashov.
Aıta keteıik, sheteldik azamattarǵa JSN alý úshin HQO-ǵa ekinshi ret oralý qajet emes. Daıyn qujat ótinishte kórsetilgen qazaqstandyq telefon nómirine jiberiledi.