«Kúndelikten» qaýip bar ma: 4 mıllıon oqýshynyń jeke málimeti sheteldik kompanııaǵa berilgen

ASTANA. QazAqparat – Májilis depýtaty Erlan Saıyrov mektep oqýshylaryna arnalǵan «Kúndelik» júıesiniń olqylyqtaryn Parlament tórinde kóterdi, dep habarlaıdy QazAqparat.

Bul jóninde depýtat Premer-Mınıstrdiń orynbasary Tamara Dúısenovaǵa, Bas Prokýror Berik Asylovqa saýal joldady.

«Elektrondy qyzmet kórsete alatyn bir emes, birneshe otandyq kompanııanyń bolýyna qaramastan, sarapshylardyń aıtýynsha, sol kezdegi zamanyn qonyshynan basqan toptardyń qysymymen quzyrly organ 4 mıllıon qazaqstandyq oqýshynyń jeke málimetterin jınaý, saqtaý jáne óńdeý qyzmetin eshqandaı irikteý men baıqaýsyz, sheteldik kompanııaǵa 12 jylǵa berip jibergen. Nátıjesinde, bul salada shetelden basqarylatyn qoldan jasalǵan monopolııa paıda boldy», - dedi Erlan Saıyrov Májilistiń jalpy otyrysynda.

Onyń aıtýynsha, syrtqy monopolııa kúshimen Qazaqstannyń barlyq balalary, muǵalimderi men ata-analary (jalpy sany 7 mıllıon adam) memleket paıdalanýǵa mindettegen «Kúndelikten» kúndelikti jaǵymsyz jarnama kórýge májbúr.

«Sonyń ishinde etıka men ulttyq dástúrge jat, sanany ýlaıtyn, jalańashtanǵan, nápsi men oıynnyń jarnamasy kóp. Bul jóninde aqparat quraldary únemi dabyl qaǵýda. Mektep oqýshylaryn jaǵymsyz jarnama qaraýǵa mindettep, sol arqyly sheteldik monopolııany baıytýǵa jol bergen zań nemese memlekettik-jekeshelik áriptestik álemniń birde-bir elinde joq. Bul az bolǵandaı, «Kúndelik» júıesi «Ulttyq aqparattyq tehnologııalar» atty memlekettik mekemeniń serverlerin paıdalanady jáne ol úshin Oqý-aǵartý mınıstrligi jyl saıyn 800 mln teńge qarjy tóleıdi degen aqparatty Bas prokýratýra tekserýi qajet», - dedi depýtat.

«Kúndelik» barlyq mektepte 2030 jylǵa deıin qoldanýǵa mindetti jalǵyz elektrondy júıe.

«Ol málimetter joǵalsa, jarnama berýshilerge satylsa nemese astyrtyn zııandy jolmen qoldanylsa, kim jaýap beredi? Bul sala monopolııalyq retteýge múlde jatpaıdy, sondyqtan básekelistik bolýy shart. Jaqynda týra osyndaı sheteldik qyzmet bolyp sanalatyn «ıAndeks taksıdegi» eresekterdiń jeke málimeti máselesi qoǵamda qyzý talqylandy. Al «Kúndelik» - bizdiń balalarymyzdyń jeke málimetine qol suǵyp, rýhanı kelbetine keri áser etetin, ulttyq qaýipsizdiktiń tamyryna balta shabýǵa qabiletti tereń problema. Balalardyń sanasy men ulttyń erteńine tóngen qaýipti eskerip, Úkimet shuǵyl áreket etýi qajet», - dedi Erlan Saıyrov.