Qumkól munaıynyń ornyn Teńiz kenishi toltyrady – mınıstrlik

NUR-SULTAN. QazAqparat – QR Energetıka mınıstri Bolat Aqsholaqov Qumkól sııaqty eski munaı kenishteriniń sarqylǵan qoryn nemen almastyratynyn túsindirdi, dep habarlaıdy QazAqparat tilshisi.

«Munaı kenishterin japqaly jatqan joqpyz. Qazir biz eski munaı kenishterinde qordyń sarqylýyna jáne munaı óndirý kóleminiń kúrt túsýine tap kelip otyrmyz. Onyń jarqyn mysaly – Qumkól kenishi. Keıingi birneshe jylda munda munaı óndirý kólemi 12 mln tonnadan 3 mln tonnaǵa deıin qysqardy. Ókinishke qaraı, mundaı quldyraý jalǵasady. Kenishterdiń sarqylýy – tabıǵı úrdis. Teńiz kenishindegi jobalardyń bárin aıaqtap, munaı óndirisiniń kólemin qosymsha 12 mln tonnaǵa deıin jetkizý kózdelip otyr», -dedi mınıstr.

Vedomstvo basshysynyń sózine qaraǵanda, Qashaǵan kenishindegi jobaǵa da úlken senim artylyp otyr.

«2026-27 jylǵa deıin «Qashaǵan» jobasynyń ekinshi kezeńin aıaqtaýdy josparlaǵanbyz. Eń negizgisi, jer qoınaýyna geologııalyq aýqymdy zertteý júrgizý qajet. Úkimet te ony qarastyryp jatyr. Óıtkeni resýrs bazasyn tek jańa kenishter esebinen ǵana tolyqtyrýǵa bolady. Biraq buǵan ýaqyt kerek. Munaı men gaz kenishterin barlaý jumystary 5 jyldan 10 jylǵa deıin ýaqyt alady. Eski kenishterdiń bári sarqylyp bitken kezde jańa ken oryndary daıyn turýy úshin barlaýdy búgin bastap ketý qajet. 2026-2027 jyldary iri munaı kenishteriniń eshqaısysyn jabý josparlanbaǵan. Tek óndiris kólemi azaıa beredi», - dedi Bolat Aqsholaqov.

Foto: ortcom.kz