«Qumar oıynnyń quldary» - respýblıkalyq basylymdarǵa sholý
***
«Egemen Qazaqstan» gazetiniń jazýynsha, keshe Memleket basshysy Nursultan Nazarbaev «Arqankergen» shekara beketinde bolǵan oqıǵaǵa baılanysty quqyq qorǵaý organdarynyń basshylarymen keńes ótkizdi. Onda Elbasy málimdeme jasady. «Men bul oqıǵany terrorıstik akt dep esepteımin. Bul ishki qaqtyǵystyń nátıjesinde bolýy múmkin. Biraq bul týraly aıtýǵa áli erte. Qazirgi belgili málimetter boıynsha shekarashylardyń kazarmasy men ofıtserler turatyn úı órtengen, qaza bolǵandardyń máıiti sol órtengen úılerdiń astynan tabyldy. Mundaı oqıǵalar beıbitshilik jaǵdaıynda bolýdyń mán-jaıy nede ekenin biz áli tekseretin bolamyz», - dedi QR Prezıdenti óz málimdemesinde.
Árbir oqýshynyń ómirine mektep qabyrǵasyndaǵy jyldar erekshe áser etedi. Kim bolamyn, kimge uqsaǵym keledi degen saýaldar basyn qyltıta bastaǵannan-aq olar sabaqtan tys ýaqytta úıirmelerge qatysyp, túrli jarystarǵa baryp, óz keleshekterine negiz qalap jatady. Astanada da sol jaǵdaı. Osyǵan deıin elordada Mahambet Ótemisuly atyndaǵy Oqýshylar saraıy jumys istep kelgen bolsa, endi onyń qataryna qurylysy jýyrda ǵana bitse de, oqýshylar tizimdelip úlgergen sý jańa Oqýshylar saraıy qosyldy. «Egemen Qazaqstan» gazeti osy jańalyqty elmen bólisý maqsatynda mekemeniń dırektory Umsyn Arqabaevany áńgimege tartqan. Suhbat «Átteń, erterek týylyp qoıyppyz» degen taqyryppen berilgen.
***
Negizinen Almatynyń «aqshasy tasyǵandary» Qapshaǵaıdy jaǵalasa, Astananyń atqaminer aýqattylary Şýchınskini saǵalaıtyn kórinedi. Senbi-jeksenbisinde «raqatqa bólengisi» kelgen ózge qalanyń saýyqqumarlary «qazaqtyń Las-Vegasyna» qaraı aǵylatyny aıdaı aqıqat. Qumar oıyndarǵa tyıym salynǵan ońtústik shaharymyzda jasyryn oıyn avtomattary áshkere bolyp jatqany bir bólek, samsaǵan qapshaǵaılyq oıynhana jarnamalary jıi ushyrasady. Ózi ketse de, kózi ketpegen jarnamadaǵy baqyr bastynyń «barmaǵyn sorǵyzar» utys somasy jelikkenderdi eliktirmeı qoımasy taǵy belgili. Іrgede tıip turǵan Qapshaǵaıǵa jetý buıym bolyp pa, táıiri? «Alash aınasy» gazetiniń tilshisi Іle ózenimen japsarlas shaǵyn qalaǵa qyzyq qýǵannan emes, oıynshylardyń minez-qulyq ereksheligin ańdamaq nıetpen jol tartqan. Bul týraly bilgińiz kelse, gazet tilshisiniń «Qumar oıynnyń quldary» atty jýrnalıstik zertteýine nazar aýdaryńyz.
Birneshe aıdan soń rejısser Ermek Tursynovtyń «Shal» fılmi qalyń kópshiliktiń nazaryna usynylatyn bolady. Ázirshe kartına festıvalder men jabyq kórsetilimderde júr. Bul týyndyny kıno túrindegi fılosofııalyq astarly áńgime deýge bolady. Rejısser Ernest Hemıngýeıdiń «Shal men teńiz» shyǵarmasynyń jelisin ala otyryp, taza qazaqy dúnıe jasap shyǵarǵan. Tumandy qarasýyqta adasqan shal janyn saqtap qalýdyń bar amalyn qarastyrady, barlyq ómirlik tájirıbesin ajalǵa qarsy qoıady. Kınoda Hemıngýeıdiń sózderi paıdalanylǵanymen, bul fılm kóne túrki dáýirinen kele jatqan jaqsylyq pen jamandyq, eskilik pen jańa zaman, rýhanılyq pen dúnıequmarlyq arasyndaǵy egesterge qatysty ıdeıalardy kórermenniń esine salady. Aty-shýly rejısser Ermek Tursynovpen shaǵyn suhbatty «Alash aınasy» gazetinde «Meniń shyǵarmashylyǵym kórermendi oılandyrýdy kózdeıdi» degen taqyryppen berilgen.
***
«Aıqyn» gazetiniń búgingi sanynda balalar aqyny Sultan Qalıevpen aradaǵy suhbat «Úlgi bolar keıipkerler aramyzda júr» degen taqyryppen berilgen. Basylym tilshisiniń barlyq saýaldaryna tuşymdy jaýap bergen aqyn: Balalar úshin elikter tulǵanyń bolǵany jaqsy. Kezinde oktıabrıattar pıonerlerge qarap, al pıonerler komsomoldarǵa qarap boı túzedi. Burynǵy balalar «Batyr bala Bolatbek» ánin áli kúnge jatqa soǵady. Osy úrdisti óshirmeýimiz kerek edi. Bir otbasyn órtten qutqarǵan balalar, dúnıejúzine tanymal shahmatshy qazaq qyzdary jaıynda jazyp júrmiz. Búgingi kúnniń keıipkerleri - solar», - deıdi.