Qumar oıyndardy jarnamalaýda eshqandaı tártip joq - Ashat Oralov

ASTANA. QazAqparat – Qumar oıyndardy jarnamalaýda tártip ornatý úshin tez arada tıisti sheshimder qabyldaý qajet. Bul týraly Mádenıet jáne sport mınıstri Ashat Oralov oıyn bıznesi máseleleri boıynsha ótken apparattyq keńeste aıtty, dep habarlaıdy QazAqparat.

Mádenıet jáne sport mınıstri Ashat Oralov vıtse-mınıstrlerdiń, komıtet tóraǵalarynyń jáne MSM apparat basshysynyń qatysýymen apparattyq keńes ótkizdi. Kún tártibindegi basty taqyryp – lýdomanııamen kúres.

Mádenıet jáne sport mınıstrligi janynan zańǵa ózgerister engizý úshin jumys toby qurylyp, belsendi jumys atqaryp jatyr. Búgingi tańda qala kóshelerine qaraıtyn bolsaq, elordadan bastap shalǵaıdaǵy aýylǵa deıin árbir kóshede bılbordtar, bannerlerde qumar oıyndardyń jarnamasy tur. Eshqandaı tártip joq. Sondyqtan munyń bárin toqtatýymyz kerek. Kerek bolsa arnaıy buıryqtarǵa, zańǵa da ózgerister engizý qajet. Bul máseleni sheshýdi sozbaı, tez arada sheshim qabyldaýymyz mańyzdy. Osy baǵyttaǵy jumysty kúsheıtýimiz kerek

, - dedi Ashat Oralov.

Mınıstr búgingi tańda elimizde býkmekerlik keńselerdegi jaǵdaı túzelip kele jatqanyn aıtty. Sońǵy 2,5 jylda olardyń sany 38-den 16-ǵa deıin azaıdy. Qazir 4 býkmekerlik keńseniń lıtsenzııasynyń kúshin joıý boıynsha jumys júrip jatyr. Jyl basynan 5 lıtsenzııa qaıtaryp alyndy.

Aıta ketsek, senator Amangeldi Tolamısov Premer-Mınıstr Álıhan Smaıylovtyń atyna joldaǵan depýtattyq saýalynda býkmekerlik keńseler jarnamasynyń kóbeıip ketkeni týraly másele kótergen bolatyn.