Qumar Aqsaqalovqa barlyq kommýnaldyq nysannyń úzdiksiz jumysyn qamtamasyz etýdi erekshe baqylaýǵa alý tapsyryldy
Prezıdent eń aldymen, Rýdnyı qalasyndaǵy jylý qubyrynyń jarylý saldarymen tanysyp, qalpyna keltirý jumystarynyń barysy týraly óńir basshylyǵynyń baıandamasyn tyńdady.
Qala ákimi Qýandyq Ispergenovtiń aıtýynsha, qazirgi ýaqytta qubyrlar ishinara qalpyna keltirilgen. Sondaı-aq, topyraq tóseý jumystary júrgizilip jatyr. Ákim jaqyn arada qalpyna keltirý jumystary tolyq aıaqtalatynyn málimdedi.
«Jalpy, elimiz boıynsha da, osy oblysta da jylý qubyrlary apatty jaǵdaıda tur. Jaǵdaı óte aýyr. Úkimetke búginnen bastap, ásirese kóktem jáne jaz aılarynda qysqy jylytý maýsymyna muqııat daıyndalýdy tapsyramyn. Bul – atqaratyn basty mindet, sebebi muny sozbalańǵa salýǵa bolmaıdy. Jelilerdiń tozý deńgeıi óte joǵary, 70, 80, keıbir jerlerde tipti 90 paıyzǵa deıin jetedi. Osy jumystarmen aınalysý qajet», - dedi Prezıdent.
Memleket basshysy jylý qubyrynyń jarylýy saldarynan zardap shekken Rýdnyı turǵyndarymen kezdesý barysynda azamattardyń ómirine bulaı qaýip tóndirýge bolmaıtynyn aıtty. Prezıdent Qostanaı oblysy men qala basshylyǵyna jaǵdaıdy jedel qalpyna keltirýdi tapsyrdy.
«Qubyrdyń jarylǵany týraly habardy tekserý úshin arnaıy keldim. Jańa ǵana Úkimetke, oblys pen qala ákimderine osy máselemen aınalysýdy tapsyrdym», - dedi Qasym-Jomart Toqaev.
Sonymen qatar, Memleket basshysy Úkimetke Rýdnyıdyń áleýmettik-ekonomıkalyq damý máselelerine erekshe nazar aýdarýdy tapsyrǵanyn atap ótti.
Qasym-Jomart Toqaev turǵyn úılerge jylýdyń qaıta berilgenin óz kózimen kórý úshin Rýdnyı turǵyndarynyń biriniń shaqyrýymen onyń páterine bardy. Qala turǵyny Olesıa Gerıa jylý berý jumysyn jedel atqarǵany úshin barlyq qyzmetkerge alǵysyn aıtty.
Prezıdent Qasym-Jomart Toqaev Úkimetke jáne Qostanaı oblysynyń ákimi Qumar Aqsaqalovqa barlyq kommýnaldyq nysannyń úzdiksiz jumysyn qamtamasyz etý isin erekshe baqylaýǵa alýdy tapsyrdy.
Foto: akorda.kz