Qumar Aqsaqalov Petropavlda 140 búldirshinge arnalǵan balabaqshany ashty

PETROPAVL. QazAqparat - Petropavlda salynyp jatqan «Orman» yqshamaýdanynda Táýelsizdik kúni qarsańynda 140 búldirshinge arnalǵan balabaqsha ashyldy, dep habarlaıdy «QazAqparat» HAA tilshisi.

Mektepke deıingi bilim berý mekemesi memlekettik-jekeshelik áriptestik aıasynda boı kóterdi. «Aq qaıyń» balabaqshasynda bıýdjettik 7 top tárbıelenedi. Búldirshindermen 48 pedagog jumys isteıdi.

«Egorov qoımalary» JShS aýdany 2 myń sharshy metrden asatyn balabaqshanyń qurylysyna aǵymdaǵy jyldyń aqpan aıynda kirisken bolatyn. Jobanyń quny 500 mıllıon teńgeni qurady.
 

«Bul - úshinshi balabaqshamyz. Olardyń barlyǵy Memleket basshysynyń saıasatynyń arqasynda qabyldanǵan memlekettik-jekeshelik áriptestik baǵdarlamasy boıynsha salyndy. Memlekettik-jekeshelik áriptestiktiń paıdasy týraly kásipkerlerge  birneshe  ret aıtqanmyn. Memleket qajetti jaǵdaıdyń bárin jasady. Eger Petropavlǵa taǵy da balabaqsha qajet bolsa, biz salyp berýge daıynbyz», - deıdi kompanııanyń dırektory Garık Bernetsıan.

Sotústik Qazaqstan oblysynyń ákimi Qumar Aqsaqalov balalar men ata-analardy jańa balabaqshanyń ashylýymen quttyqtap, óńirde QR Prezıdentiniń 2019 jylǵa deıin mektepke deıingi bilim berý mekemesimen tolyq qamtý jónindegi tapsyrmasy merziminen buryn oryndalǵanyn atap ótti.

«Osy balabaqshanyń ashylýymen endi Soltústik Qazaqstanda 3-6 jas aralyǵyndaǵy barsha balaǵa oryndar jetkilikti boldy», - dedi Qumar Aqsaqalov.