Qumar Aqsaqalov: Kartop baǵasyn ýysta ustaý úshin eksportty retteý kerek

NUR-SULTAN. QazAqparat – Soltústik Qazaqstan oblysynyń ákimi Qumar Aqsaqalov ortalyq kommýnıkatsııalar qyzmetine ótken baspasóz konferentsııasynda egindi óńirde kartop baǵasynyń qymbattaý sebepterin túsindirdi, dep habarlaıdy QazAqparat.

«Bul máseleni tek eksportty retteý arqyly sheshýge bolady. Óıtkeni ekonomıka ashyq. Úkimetpen jáne basqa da ákimdiktermen birlesip, kókónisterdiń qajetti kólemin eseptep, barlyǵyn eksportqa shyǵarmaı, elde qajetti kólemdi qaldyrý kerek. Kókónis baǵasy kóterilgeni ras. Kúzden bastap baǵalar kúrt kóterile bastady. Sondyqtan sharýa qojalyqtar kóptegen taýarlardy belsendi eksporttady. Mysaly, kúzde kartopty 95 teńge kóterme baǵamen satqan faktiler bar», - dedi ákim.

SQO ákimi oblysta turaqtandyrý qory bar ekenin eske saldy.

«Turaqtandyrý qory bizde de bar. Biz kem degende osy qoımaǵa 800 tonna kartop satyp alamyz, bolashaqta olardy 26 dúkende tómen baǵamen satamyz. Qys boıy bizdiń kartopty 100 nemese 110 teńgege satty», - dedi aımaq basshysy.

Qumar Aqsaqalov jyl saıyn mamyr aıyna ońtústik oblystardan kartoptyń jańa partııasy keletinin, biraq ony maýsymǵa deıin saqtaý qıyn ekenin atap ótti.

«Ekologııalyq taza ónim bolǵandyqtan, kartopty uzaq saqtaý úshin túrli jańa tehnologııalardy qoldansaq ta, bzylyp ketedi. Bıyl mamyr aıynyń ortasynda kartop bolmaı, saldarynan 2-3 apta boıy baǵa joǵary bolyp turdy. Áıtpese ózimizdi 100% kartop pen kókónispen qamtamasyz ete alamyz», - dedi oblys ákimi.