Qulsary qalasynyń mańyna munaı tógilgeni anyqtaldy

ATYRAÝ. QazAqparat – Atyraý oblysyndaǵy Jylyoı aýdanynyń ortalyǵy – Qulsary qalasynyń mańyna munaı tógilgeni anyqtaldy. Bul jaıt týraly qala turǵyndary áleýmettik jelige vıdeo júktegen. Oblystyq ekologııa departamentiniń baspasóz qyzmeti osyǵan baılanysty arnaıy komıssııa qurylǵanyn málim etti, dep habarlaıdy QazAqparat tilshisi.

«Qulsary qalasynyń turǵyny áleýmettik jelige «Murager» shaǵyn aýdanynyń aýmaǵyna munaı ónimderi tógilgeni týraly vıdeo jarııalady. Osyǵan oraı, arnaıy komıssııa quryldy. Onyń quramynda oblystyq ekologııa departamenti men Qulsary qalalyq ákimdiginiń mamandary jáne qoǵam belsendileri bar. Departament mamandary komıssııa múshelerimen birge 31 mamyrda vıdeoda kórsetilgen jerde tekserý jumystaryn júrgizdi. Atalǵan aýmaqtyń munaı ónimderimen búlingeni anyqtaldy», - dep habarlady departamenttiń baspasóz qyzmeti.

Aýmaǵy 60h70 metr sol jerden temir bóshkeler, avtokólik dóńgelekteri, basqa da zattar tabylǵan. Budan ózge 100 tonnaǵa jýyq qurylys qaldyǵy tastalǵan.

«Tekserý kezinde Qulsary qalasynyń óndiristik aımaǵynan 400-500 metrlik qashyqta or qazylyp, oǵan munaı ónimderi tógilgeni anyqtaldy. Óndiristik aımaqtan shamamen 1 shaqyrymdyq qashyqta aınalasy betonmen qaptalǵan qazan tabyldy. Qazannyń ishine sý quıylǵan», - dep málim etti departamenttiń baspasóz qyzmeti.

Departament mamandary zerthanalyq taldaý júrgizý úshin búlingen jerden topyraq, al qazannan sý synamasyn aldy.

Eske sala ketelik, budan buryn Atyraý oblysynda bıyl 60 gıdrogeologııalyq uńǵyma joıylatynyn habarlaǵan bolatynbyz.