Qulsary qalasynda jas kásipker kir sabyn óndirisin qolǵa aldy

ATYRAÝ. QazAqparat – Atyraý oblysynyń Qulsary qalasynda kir sabyn shyǵaryla bastady, dep habarlaıdy QazAqparat tilshisi.

Jylyoı aýdany ákimdigi baspasóz qyzmetiniń aqparatyna súıensek, jergilikti kásipker Bekarys Juqataev kir sabyn shyǵarý isin qolǵa alǵan.

Jas jigittiń bul kásipti bastaǵanyna kóp ýaqyt ótpegen. Biraq, qazirdiń ózinde onyń ónimin satyp alatyn tutynýshylar qatary kóbeıgen.

«Sońǵy 4-5 jyldan beri kir sabyn shyǵarýdy oılastyrǵan edim. Óıtkeni, kir sabyn kúndelikti turmysta jıi qoldanylady. Sol sebepten, ony shyǵarý ádisin meńgerý úshin izdendim. Aqtaý qalasynan arnaıy apparatty alyp keldim. Kir sabyn jasaýǵa toń maı men kúnbaǵys maıyn shıkizat retinde paıdalanamyn. Ony bastapqyda Almaty oblysynan tapsyryspen aldyrdym. Endi mundaı shıkizat osy óńirden tabylyp otyr. Qazir suranystyń artýyna baılanysty kúnine 2 myń sabyn shyǵaramyn. Sabynǵa «Jylyoi Soap» ataýyn berýdi jón kórdim», - deıdi Bekarys Juqataev.

Jas kásipker endigide suıyq sabyn jáne ıis sabyn shyǵarýdy josparlap otyr. Bul úshin memlekettik granttarǵa qatysýǵa nıet bildirip otyr.

«Bir kir sabynnyń baǵasy 100 teńgeden bastalady. Eń qymbaty – 250 teńge. Bul baǵa sabynnyń salmaǵyna, syrtyndaǵy arnaıy qaptamasyna baılanysty qoıylǵan», - deıdi Bekarys Juqataev.

Eske sala ketelik, budan buryn Atyraý oblysynda aýyl kásipkeri buqtyrylǵan túıe etin qalbyrǵa salyp shyǵaratynyn jazǵan edik. Isataı aýdanynyń Janbaı aýylynda turatyn Aınur Sısekenova qalbyrdy Almaty qalasynan aldyrady. Ónim sapaly bolýy úshin qalbyrlar zalalsyzdandyrylady. Arnaıy qurylǵymen týralǵan túıe etin tuzdap qoıady. Sodan keıin ǵana qalbyrǵa salady.