Qulsarynyń 357 turǵyny ótemaqy alý úshin kelisimshartqa qol qoıdy
Atyraý oblysynyń jedel shtabynan málim etkendeı, Qulsary qalasynda mobıldi toptar bir táýlikte turǵyndarǵa 300-ge jýyq baǵalaý paraǵyn taratqan.
«Búginge deıin jumys komıssııasy 1 200 nysandy baǵalaý qorytyndysyn daıyndady. Úıi sýǵa ketken 357 turǵyn ótemaqy alý týraly kelisimge qol qoıdy. Al, 109 turǵynnyń jeke shotyna ótemaqy qarajaty aýdaryldy», - dep habarlady jedel shtabtan.
Qulsary qalasynyń turǵyny Nurshat Áýelbaevanyń aıtýynsha, baǵalaý kompanııasy eseptep, usynǵan qarajat onyń esebimen sáıkes kelgen.
«Meniń úıim apatty dep tanyldy. Endi sol úıdi buzamyz. Tasqyn sý kirgen úıimniń quny ádil baǵalandy. Memleketten túsetin ótemaqy shyǵynymdy tolyǵymen jabady. Aqshalaı ótemaqyǵa jańa úı satyp alamyn nemese jańa úı salýym múmkin. Qazir bul máseleni otbasymyzben aqyldasyp otyrmyz», - dedi Nurshat Áýelbaı.
Al, Kúnzıra Tájiǵulova aqshalaı ótemaqyǵa jańa turǵyn úı satyp alýdy kózdegen.
«Úıime kirgen sý eki metr deńgeıinde saqtalyp turdy. Sonyń saldarynan apatty dep tanylǵan úıimdi alańsyz buzýǵa bolady. Onyń ornyna jańa turǵyn úı satyp alamyz», - dedi Kúnzıra Tájigulova.
Sý tasqynynan búlingen múlikti baǵalaý jumysyn osy aptanyń sońyna deıin aıaqtaý josparlanyp otyr.
«Qazir Qulsary qalasynda baǵalaý nátıjesin tanystyrýǵa 20 mobıldi top jumyldy. Olar kúsheıtilgen rejımde jumys isteıdi. Mobıldi toptardyń jumysy barlyq baǵalaý jumysy tolyq aıaqtalǵanǵa deıin kún saıyn demalyssyz júrgiziledi. Turǵyndarǵa №20 mektepte apatty dep tanylǵan úı ıeleri men sý tasqynynan zardap shekkenderge aqshalaı ótemaqy tóleýge qatysty aqparat berilip otyr. Al, mádenıet úıinde ótemaqy alý úshin kelisimshartqa qol qoıylady», - dep málim etti oblystyq jedel shtabtan.
Eske sala ketelik, buǵan deıin Jylyoı aýdany ákimdigi aldynda birneshe kún turǵan qulsarylyq turǵyndar taraǵanyn jazǵan bolatynbyz.