Qulsarylyq kásipkerdiń dúkeninde veıp ónimderi men nasybaı satylǵan

<p>ATYRAÝ. KAZINFORM — Atyraý oblysyndaǵy Qulsary qalasynda turatyn kásipkerdiń dúkeninde veıp ónimderi men nasybaı satylǵany anyqtalyp otyr.</p>

Atyraý oblystyq polıtsııa departamentiniń baspasóz qyzmetinen málim etkendeı, bul derekti Jylyoı aýdanyndyq polıtsııa bóliminiń qyzmetkerleri anyqtaǵan. 

«Polıtsııa qyzmetkerleriniń jedel-izdestirý is-sharasy kezinde azyq-túlik dúkeninde veıp ónimderiniń satylyp jatqany belgili boldy. Qulsary qalasynda turatyn 31 jastaǵy kásipker óziniń ıeligindegi dúkende zańsyz temeki ónimderin saýdalap kelgen. Dúkenge júrgizilgen tekserý barysynda 123 dana veıp ónimi men 5 dana nasybaı tabyldy. Zańsyz saýdalanǵan ónimder tárkilendi», — dep habarlady departamenttiń baspasóz qyzmeti. 

Qazir zańsyz saýdamen aınalysqan kásipkerge qatysty qylmystyq is tirkeldi. Tergeý amaldary júrgizilip jatyr. 

Sondaı-aq, Atyraý qalasyndaǵy qoǵamdyq oryndarda qorqor tutynýdyń 37 deregin anyqtalǵan. 

«Qoǵamdyq oryndarda temeki ónimderin paıdalaný boıynsha quqyq buzýshylyqtardy anyqtaý maqsatynda oıyn-saýyq oryndarynda tekserý júrgizildi. Reıdtiń nátıjesinde oblys ortalyǵyndaǵy kóńil kóteretin oryndarda qorqor tutynýdyń 37 deregin anyqtalyp otyr. Quqyq buzýshylyqqa jol bergen kásipkerler men jeke tulǵalardy jaýapkershilikke tartyldy», — dep málim etti departamenttiń baspasóz qyzmetinen.

Eske sala keteıik, buǵan deıin Atyraýda esirtki úshin jaýapqa tartylǵandardyń 60 paıyzy — jergilikti turǵyndar ekenin jazǵan edik.