Qulsaryǵa kómekke barǵan saryaǵashtyq shashtaraz qutqarýshylardyń shashyn tegin qıǵan

<p>TÚRKІSTAN. KAZINFORM - Qanaǵat eldi mekeniniń turǵyny, shashtaraz Salıýt Pirimqulov sý tasqyny kezinde Qulsaryǵa kómekke baryp, sol aımaqtaǵy qutqarýshylar men jergilikti turǵyndardyń shashyn tegin qıǵan.</p>

Erikti azamat sondaı-aq áskerı bólimshelerge de baryp, qatardaǵy jaýyngerlerge qyzmet kórsetken. Óz kezeginde qulsarylyqtar Túrkistan oblysynyń turǵynyna alǵystaryn jetkizgen. 

«Úıde jata almadym. Sý tasqynymen kúresip, ábigerge túsip jatqan halyqqa qolymnan kelgenshe kómek bergim keldi. Sodan zattarymdy jınap, jolǵa shyǵyp kettim», - deıdi shashtaraz. 

Salıýt Pirimqulov Qulsary qalasynda 20 shaqty kún bolǵan. Sol kúnderi tańerteń ertemen jumysqa shyǵyp, keshkisin qas qaraıa qaıtyp júrgen. Kúndelikti 20-25 qutqarýshy men qala turǵyndarynyń shashyn alǵan. 

«Anam jas kezimnen eńbekke baýlyp ósirdi. «Eshkimniń ala jibin attama», «Qaıyrymdylyq jasasań qaıyryn kóresiń» dep qaıyrymdylyqqa úıretti. Sondyqtan árdaıym qaıyrymdylyq jasap, kómek berýge asyǵyp turamyn. Kishkentaıymnan shash qysqartatyn kásip ıeleriniń qasynda júrip, shash alýdy úırenip aldym», - deıdi ol. 

Salıýt Pirimqulovty saryaǵashtyqtar jaqsy tanıdy. 30 jyldan astam eńbek ótili bar azamat ta kelgen klıentteriniń kóńilinen shyǵatyndaı etip shashyn qysqartyp berip otyrǵan. Aqysy da arzan. Tipti, keı kezderi tutynýshylarynyń bergenin alady. Al, aqshasy joq bolsa, tegin qyzmet kórsetýge ázir. 

«Eńbek árbir adamdy bıikke kóteredi. Áleýmettik jaǵdaıyn jaqsartady. Qoǵamǵa beıimdeıdi. Táýlik boıy tynymsyz eńbek etýimniń arqasynda meniń de abyroıym asqaqtap otyr. Sondyqtan barshańyzdy el úshin emirene eńbek etýge shaqyramyn», - deıdi Salıýt Pirimqulov. 

Aıta keterligi, Túrkistan oblysynan sý tasqyny bolǵan aımaqtarǵa Tótenshe jaǵdaılar departamentiniń qutqarýshylary men erikti azamattar, belsendi jastar jáne 100-den asa tehnıka, sondaı-aq gýmanıtarlyq kómekter jóneltilgen bolatyn.