Qulsarydan Reseıge barǵan 120 oqýshy demalysyn jalǵastyratyn boldy

<p>ATYRAÝ. KAZINFORM &ndash; Atyraý oblysyndaǵy Qulsary qalasynan Reseıge barǵan 120 oqýshy demalysyn jalǵastyratyn boldy. Olar &laquo;Qazaqstan geologi&raquo; emdeý pansıonatynda 4 qarashaǵa deıin demalady.</p>

Bul derekti Atyraý oblystyq bilim berý basqarmasynyń basshysy Marat Ábýov rastady.

Onyń aıtýynsha, Jylyoı aýdanyndaǵy sý tasqynynan zardap shekken otbasylardyń 174 balasy atalǵan pansıonatqa demalýǵa jiberilgen.

«Aýdandyq bilim bólimi túzgen tizimge sáıkes 27 qazanda 174 oqýshy Reseıdegi «Qazaqstan geologi» emdeý pansıonatyna barǵan edi. Onyń ishinde 113 ul, 61 qyz bar. Olardy 18 muǵalim alyp bardy. Alaıda, pansıonattaǵy keıbir bólmege qońyz kirgeni anyqtaldy. Osyǵan baılanysty oqýshylardy elge qaıtarýǵa sheshim qabyldaǵan edik. Degenmen, keıbir oqýshylar demalysty jalǵastyrýǵa ótinish bildirdi. Oqýshylardyń bul ótinishin ata-analary da qoldady», -deıdi Marat Ábýov.

Basqarma basshynyń deregine qaraǵanda, «Qazaqstan geologi» pansıonatynda 120 oqýshy demalysyn jalǵastyrýǵa qalǵan. Oqýshylarmen birge 13 muǵalim bolady. Al, 54 oqýshy elge oralý úshin jolǵa shyqqan.

«Qazir atalǵan pansıonatta oqýshylardyń demalysyn jaqsy ótkizýine barlyq jaǵdaı jasaldy. Ózim sol pansıonatqa balalardyń jaǵdaıyn bilý úshin baramyn», - dedi Marat Ábýov.

«Qazaqstan geologi» emdeý pansıonaty 2001 jyldan beri jumys isteıdi. Reseı Federatsııasynyń Stavropol ólkesinde Jeleznovodsk qalasynyń mańyndaǵy Inozemtsevo kentinde ornalasqan. Pansıonat ornalasqan Beshtaý taýynyń etegindegi jer Qazaqstannyń Respýblıkasynyń menshiginde berilgen.

Eske sala ketelik, buǵan deıin Reseıge demalýǵa barǵan oqýshylar keri qaıtatynyn habarlaǵan edik.