Qulsarydaǵy sý tazartý qurylǵylary jańǵyrtylýy múmkin
Jylyoı aýdanynyń Qulsary qalasyna aýyz sý «Astrahan-Mańǵyshlaq» magıstraldyq sý qubyrymen jetkiziledi. Sodan keıin «Magıstraldyq sý qubyry» JShS stansasynda tazartý júrgiziledi. Al, turǵyndarǵa taza sý «Jylyoısý» KMK arqyly beriledi.
«Magıstraldyq sý qubyry» JShS dırektorynyń mindetin atqarýshy Erkin Tańqybaevtyń aıtýynsha, kóktemde sý sapasy ózgergen. Oǵan Qıǵash ózeniniń tasyp, «Astrahan-Mańǵyshlaq» sý qubyrymen jetkiziletin sýdyń shamadan tys laılanǵany sebep bolǵan. Sondaı-aq sý qubyrynyń boıynda jańa ýchaskeniń paıdalanýǵa berilýi áser etken.
«Qazir bizdiń mekemede 7 rezervýar bar. Onyń 5-eýi jumys istep tur. Bireýi jóndeýge qoıyldy. Jańadan bir rezervýar salynyp jatyr. Sý birneshe ret tazartylyp, keıin hlor qosylady. Qıǵash ózenindegi qorshaý ornynda tazartý júrgizilip, sý sapasy jaqsaryp keledi. Kún saıyn sý qubyrynan synama alyp, sapasyn baqylap otyrmyz», - deıdi Erkin Tańqybaev.
Al, «Jylyoısý» KMK dırektorynyń mindetin atqarýshy Batyr Keıkinniń aıtýyna qaraǵanda, sý saqtalatyn rezervýarlar tazartylyp, dezınfektsııalanady. Sondaı-aq Qulsary qalasyndaǵy sýmen jabdyqtaý jelilerin jýý jumystary júrgizilgen.
Alaıda, oblys ákimi Serik Shápkenovtiń pikirinshe, Qulsarydaǵy qabatty úılerdi sýmen jabdyqtaý júıesin tazartý qajet.
«Kóktemde Qıǵash ózeniniń deńgeıi kóterilgen joq. Demek, másele jumystyń júıesizdiginde bolyp tur. Turǵyndardy taza aýyz sýmen qamtýdy mamyrda mindettegen edim. Eshqandaı nátıje kórip turǵan joqpyn. Bul – salǵyrttyqty keshirmeıtin másele. Aýyz sýdyń sapasy turǵyndardyń densaýlyǵyna áser etedi. Endi qysqa merzimde zamanaýı tehnologııalardy paıdalanyp, sý tazartý qurylǵylaryn qaıta qurý jobasyn ázirleýdi tapsyramyn», - dedi Serik Shápkenov.
Eske sala ketelik, buǵan deıin Qulsaryda sý tasqynynan búlingen nysandardy qalpyna keltirý qalaı júrip jatqanyn jazǵan edik.