Qulsaryda sý basqan taǵy 200-den astam úıdi baǵalaý qorytyndysy daıyndalǵan

<p>ATYRAÝ. KAZINFORM &ndash; Qulsary qalasynda mobıldik toptar sý tasqynynan zardap shekken úılerdiń zalalyn baǵalaý jáne tehnıkalyq saraptama qorytyndysyn taratý boıynsha jumysty jalǵastyryp jatyr.</p>

«Búgin 6 mobıldi top músheleri 100-ge jýyq turǵynǵa baǵalaý nátıjelerin tanystyrady. Baǵalaý nátıjesimen tanysqan turǵyndar 2 kúnnen soń ótemaqy alý úshin Jylyoı aýdanynyń ákimdigine júgine alady», - dep habarlady Atyraý oblystyq jedel shtaby. 

Qulsary qalasynyń turǵyny Gúlnur Іlııasovanyń aıtýynsha, úıine kirgen tasqyn sýdyń deńgeıi tereze jaqtaýyna deıin jetken. 

«Úıimiz turýǵa jaramsyz bolyp qaldy. Biz úıdiń bir sharshy metrine 240 myń teńge berilse, oǵan kelisemiz. Bul qarajat úıimizdi buzyp, qaıtadan salýǵa jetkilikti bolady», - deıdi Gúlnur Іlııasova.

Sý tasqynnan zardap shekken taǵy bir turǵyn Kúlásh Amanbaıqyzy memlekettiń qoldaý kórsetetinine senedi. 

«Memleket tarapynan úıimniń bir sharshy metrine 200 myń - 240 myń teńge kóleminde usynylyp otyrǵan qarjy jetkilikti dep oılaımyn. Dál qazirgi maqsatym – úıimdi tezdetip salyp alý. Maǵan artyq eshteńe qajet emes, usynylǵan ótemaqyǵa rızamyn», - deıdi Kúlásh Amanbaıqyzy. 

Qazir Qulsary qalasyndaǵy №20 mektepte úıleri apatty dep tanylǵan turǵyndarmen memorandým jasaý úshin ótinishter qabyldanyp jatyr. 

«Memorandýmǵa sáıkes turǵyndarǵa tasqyn sýdan búlingen úıi úshin ótemaqy tóleýge baılanysty eki nuqsa usynylady. Turǵyndar ózine yńǵaıly nusqany tańdaýy qajet. Birinshisi – zardap shekkenderdiń arnaıy nysanaly shotyna tıisti qarjyny aýdarý. Bul qarjy jańa turǵyn úı satyp alýǵa, turǵyn úı salýǵa nemese jóndeý-qalpyna keltirý jumystaryna jumsalýy kerek. Ekinshisi – jergilikti atqarýshy organnyń jobalyq úlgisi boıynsha 3 aı ishinde paıdalanýǵa berý mindettemesimen úı salý», - dep málim etti oblystyq jedel shtabtan. 

Eske sala ketelik, buǵan deıin Qulsarydaǵy sý tasqynynan keıin apatty jaǵdaıda turǵan 756 úı anyqtalǵanyn habarlaǵan bolatynbyz. Sondaı-aq Qulsaryda úıdi baǵalaý qorytyndysymen kelisken 6 otbasy ótemaqyǵa ótinish bergenin jazǵan edik.