Qulsaryda salynyp jatqan 100 úıdiń 80-i tamyzdyń sońyna deıin paıdalanýǵa beriledi
Atyraý oblystyq Qurylys, sáýlet jáne qala qurylysy basqarmasynyń basshysy Nurbergen Qusaıynovtyń málimetinshe, Qulsary qalasyndaǵy 100 úıdiń qurylysyn júrgizýge 8 merdiger kompanııa tartylǵan. Bul kompanııalarda 374 adam jumys isteıdi.
«Jylyoı aýdanynyń ortalyǵy – Qulsary qalasynda tasqynnan zardap shekken turǵyndar úshin jańa shaǵyn aýdanda 100 úıdiń qurylysy júrgizilip jatyr. Jańa shaǵyn aýdanǵa «Bolashaq» degen ataý berildi. Qazir munda qurylys jumysy qarqyn aldy. Tamyz aıynyń sońyna deıin jańadan salynǵan 80 úıdi paıdalanýǵa berý kózdelip otyr. Al, 20 turǵyn úıdiń qurylysy qyrkúıek aıynda aıaqtalady. Ár úıdiń kólemi – 100 sharshy metr, 5 bólmesi bar», - dep habarlady Nurbergen Qusaıynov.
Onyń deregine súıensek, osy kezge deıin 81 úıdiń qabyrǵasyna tas qalaý jumysy aıaqtalǵan. Al, 41 úıdiń shatyryn jabý júrip jatyr. Shatyry jabylǵan 22 úıdiń qabyrǵasyna ishki, syrtqy sylaq jaǵý bastalyp, 31 úıge elektr, 16 úıge sý men káriz jelisi tartylǵan.
Sondaı-aq Qulsary qalasynda sý tasqyny kezinde búlingen 12,1 shaqyrym avtojoldy qalpyna keltirý josparlanǵan. Qazir joldyń 4,9 shaqyrymy jóndeldi.
Eske sala ketelik, buǵan deıin Qulsaryda 100 úıdiń irgetasy quıylyp, 78-niń qabyrǵasy qalanǵanyn jazǵan bolatynbyz.
Sondaı-aq Qulsary halqyna úı satyp alýǵa, jóndeýge 70 mlrd teńge aýdarylǵanyn habarlaǵan edik.