Qulsaryda qaıtys bolǵan órt sóndirýshini tok soqqan
Atyraý oblystyq tótenshe jaǵdaılar departamenti qoǵammen baılanys tobynyń málimetinshe, baqılyq bolǵan órt sóndirýshi Beıbarys Raqym 23 jasta bolǵan.
Marqum tótenshe jaǵdaılar salasyndaǵy jumysyn 2021 jyldan bastaǵan. Birneshe iri ári kúrdeli órtti sóndirýge qatysyp, adam ómirin, múlkin qutqarý men qorǵaýda belsendilik tanytqan.
Sońǵy atqarǵan qyzmeti – Atyraý qalasyndaǵy №1 mamandandyrylǵan órt sóndirý bóliminiń bólimshe komandıri.
«Azamattyq qorǵaý serjanty Beıbarys Raqym 24 sáýirde Qulsary qalasyndaǵy tasqyn sýdy sorý boıynsha avarııalyq-qutqarý jumystaryn júrgizýge issaparǵa jiberildi. Jylyoı aýdandyq shtabynyń nusqaýy boıynsha 15 mamyrdan beri «Basshy Ata» zıraty aýmaǵyndaǵy ýchaskede Atyraý oblysy TJD-nyń 13 jeke quramy 5 tehnıkamen sý aıdaý jumystaryn júrgizýdi qolǵa aldy. Bólim komandıri Beıbarys Raqym ór sýyn sorýǵa arnalǵan tehnıkany ornatý úshin kóliktiń joǵarǵy jaǵyna shyqqan. Aldyn ala málimetke qaraǵanda, ol óz erkimen jaqyn mańdaǵy órt sóndirý jeńin jerge túsirý úshin kóliktiń joǵarǵy jaǵynda turǵan. Joǵaryda júrgizilgen elektr berý jelisi abaısyzda qutqarýshynyń denesine tıip, órt sóndirýshi qulaǵan. Ol osy ýchaskedegi jumystardy júrgizetin jeke quramdy basqarǵan. Oǵan alǵashqy medıtsınalyq kómek kórsetilgenimen, keshki saǵat 20:55-te kelgen jedel medıtsınalyq járdem qyzmetkerleri qutqarýshynyń qaıtys bolǵanyn anyqtady», - dep málimdedi departamenttiń qoǵammen baılanys toby.
Marqum – ata-anasynyń mápelep ósirgen 5 balasynyń biri. Eki ápkesi, 1 aǵasy men 1 qaryndasy bar. Sońynda jary qaldy.
Eske sala ketelik, buǵan deıin Jylyoıda sý sorǵyzý jumystary kezinde qutqarýshy jigit qaza tapqany habarlanǵan edi.