Kúlásh Baıseıitova kúıshi Dınamen óte jaqsy qarym-qatynasta bolǵan - Aıtqalı Jaıymov

ASTANA. QazAqparat - E.Rahmadıev atyndaǵy Memlekettik akademııalyq fılarmonııasynyń Qazaq orkestri XXVI kontserttik maýsym shymyldyǵyn kúmis kómeı ánshisi Kúlásh Baıseıitovanyń 110 jyldyq mereıtoıyna arnalǵan «Bulbul» atty kontsertimen ashty, dep habarlaıdy QazAqparat.

24 jasynda KSRO halyq ártisi atanǵan Kúlásh Baıseıitovanyń týǵanyna bıyl 110 jyl tolyp otyr. Qazaq operasynyń negizin salýshylardyń biri, Memlekettik syılyqtyń laýreaty, kórnekti opera ánshisi, drama aktrısasy, qoǵam qaıratkeri Kúlásh Baıseıitovanyń orny tarıhta altyn árippen saqtaldy.

Bulbul ánshi bala kezinen halyq ánderin tamasha oryndaýymen, boıyndaǵy ártistik sheberligimen kózge túse bastaǵan. Qysqa ǵana ǵumyrynda «Qazaqtyń bulbuly» atanǵan talantty ánshi - el aýzynda qalǵan ańyz tulǵalardyń biri. Ol qazaqstandyq jáne sheteldik operada san-qyrly obrazdardy somdady, onyń ishinde Evgenıı Brýsılovskııdiń «Qyz Jibek» operasynda Jibektiń, Ahmet Jubanov pen Latıf Hamıdıdiń «Abaı» operasynda Ajar beınesin, Petr Chaıkovskııdiń «Evgenıı Onegın», Djakoma Pýchchındiń «Chıo-Chıo san» operalarynda basty rólderdi oınady. Osy rólder arqyly kórermenniń ystyq yqylasyna bólendi.

«Bulbul» kontserti qarsanyńda Qazaq orkestriniń kórkemdik jetekshisi jáne bas dırıjeri – Qazaqstan Respýblıkasynyń eńbek sińirgen qaıratkeri, «Parasat» ordeniniń ıegeri, professor Aıtqalı Jaıymov pikirin bildirdi.

«Kúlásh apa elimizdiń atyn asqaqtatqan, halyq maqtanyshyna aınalǵan, qaıtalanbas daýys ıesi. Bulbul ánshi 1936 jyly qazaq mádenıetiniń on kúndigin ótkizý úshin elimizdiń ónerpazdarymen birge Máskeýge attanady. Onyń oryndaýshylyq sheberligi óte joǵary baǵalanyp, kóptiń qoshemetine bólengen bolatyn. Kontsertimizdi «Bulbul» dep ataýymyz beker emes, sebebi ásem úndi Kúlásh apamyz qalyń jurtshylyqqa «Bulbul» esimimen tańylǵan edi. Keıingi urpaq talantty óner ıesi esimin eshqashan umytpaıdy dep senemiz.

Kúlásh apanyń repertýary óte keń jáne baı. Bir kontsert baǵdarlamasynda barlyq repertýardy oryndaý múmkin emes. Kúlásh apamyz kúı anasy Dına shesheımen óte jaqsy qarym-qatynasta bolǵan, sol sebepten Dınanyń «Ásem qońyr» kúıin engizip otyrmyz. Jambyl atanyń «Kúláshqa» áni, Evgenıı Brýsılovskııdiń «Qyz Jibek» operasynan «Gákký», Latıf Hamıdıdiń «Qazaq valsi» men «Bulbul», Muqan Tólebavetyń «Birjan men Sara» operalarynan aıtys, «Abaı» operasynan Ajar arııasy, «Qyz Jibek» operasynan «Shegeniń termesi» oryndalady.

Sondaı-aq, Kúlásh Baıseıitova Qurmanǵazy orkestrimen tyǵyz baılanysta edi. Olar alǵashqy gastroldik saparlarǵa birge barǵan. Sony eskere otyryp, Qurmanǵazy babamyzdyń «Saryarqa» kúıimen kontsertimizdi aıaqtaımyz», dep atap ótti Aıtqalı Jaıymov.

Kontsertte Qazaqstan Respýblıkasynyń Eńbek sińirgen qaıratkerleri: Araılym Rahymqyzy, Svetlana Aıtbaeva, Súndet Baıǵojın, Bıbigúl Januzaq, «Daryn» memlekettik jastar syılyǵynyń laýreaty Altynbek Ábilda, Halyqaralyq jáne respýblıkalyq baıqaýlardyń laýreattary Ferýza Rahmetova, Áıgerim Amanjolova, Áıgerim Oraz, Talǵat Allabırınov, Botagóz Táshimova óner kórsetti.

Qazaq orkestriniń bas dırıjeri – Aıtqalı Jaıymov. Dırıjer – mádenıet qaıratkeri Nurlan Bekenov.