Kúlásh Ahmetova: «Meniń sáýleli sátterim» - baspasózge sholý

ASTANA. QazAqparat - «QazAqparat» halyqaralyq aqparattyq agenttigi 14 qańtar, beısenbi kúni jaryq kórgen respýblıkalyq buqaralyq aqparat quraldaryndaǵy ózekti maqalalarǵa sholýdy usynady.

***

Kúni keshe Qazaqstan Respýblıkasy parlamenti Májilisindegi úsh partııanyń fraktsııalary ortaq bir sheshimge kele otyryp, Memleket basshysy Nursultan Nazarbaev pen Qazaqstan halqyna merziminen buryn parlamenttik saılaý ótkizý týraly úndeý joldaǵany belgili. Bul týraly tolyq aqparat bere kele, «Egemen Qazaqstan» gazeti «daǵdarystan daǵdarýdyń qajeti joq» dep jazady.«Májilis taraıdy eken degen áńgimeniń shyqqanyna da biraz bolǵan-dy. Osy áńgimeniń shyndyqqa aınalatyn kezi de alys emes sııaqty. Óıtkeni, keshe Parlament Májilisiniń Tóraǵasy Qabıbolla Jaqypovtyń jetekshiligimen jańa jyldaǵy alǵashqy ótken palatanyń kezekti jalpy otyrysynyń kún tártibine birinshi qaralý úshin osy másele engizildi. Bul Májilis saılaýyn jergilikti máslıhattar saılaýymen qosa ótkizý úshin qolaıly usynys sanalady», dep jazady basylym.Besinshi saılanǵan Par­la­mentti taratý jáne jańa saılaý­dy taǵaıyndaý týraly Qazaq­stan Prezıdentiniń atyna jol­dan­ǵan Úndeýdi kún tártibine engi­zýdi usynǵan Májilis depýtaty Nurlan Ábdirov boldy. Onyń usynysyn áriptesteri biraýyzdan qoldady. Depýtat óz sózinde úndeýdiń astarynda jatqan tórt negizgi sebepti atap ótti. Ol nendeı sebep jáne Májilistiń sheshimine qatysty sarapshylar men buqara halyq qandaı pikir bildirip jatyr, bul týraly tolyǵyraq «Egemen Qazaqstan» gazetiniń búgingi sanynda shyqqan «Oryndy oı, utymdy usynys» atty maqaladan oqı alasyzdar.

Sondaı-aq, «Egemen Qazaqstan» gazetiniń búgingi sanynda Astana qalasy Bilim berý basqarmasynyń basshysy Elmıra Sýhanberdıevanyń pikiri jarııalanyp otyr. Basqarma basshysy óz pikirinde Memleket basshysy Nursultan Nazarbaevtyń «Ult Jospary - qazaqstandyq armanǵa bastaıtyn jol» atty baǵdarlamalyq maqalasyna qatysty óz oıyn bildirgen. «Elbasy ómirimizdiń barlyq salalaryn saralap, onda júzege asyrylatyn jańa bastamalar men alǵa qoıǵan maqsattar jaıly baıandaıdy. Prezıdent atap kórsetkendeı, 2016 jyldyń 1 qańtarynan «5 ınstıtýttyq reformany júzege asyrý boıynsha 100 naqty qadam» Ult Josparyn oryndaýdyń praktıkalyq kezeńi bastaldy. Demek, osy kezeń aıasynda túrli syndarly da mańyzdy sharalar júzege aspaq. 2016 jylǵy qańtardan bastap, Astana qalasynyń 24 mektebinde tehnıkalyq mamandyqtardy oqytý bastaldy. Qanatqaqty joba eki jyldyq kásibı daıyndyqqa negizdelgen jáne mektepterdiń 10 jáne 11 synyp oqýshylaryna arnalǵan. Onyń maqsaty - óz erkimen mamandyq tańdaýy úshin oqýshylarǵa kásibı baǵyt-baǵdar berý. Osy bastamanyń arqasynda mektep túlekteri orta bilim týraly attestatpen birge ózderi tańdaǵan mamandyqtary bo­ıyn­sha bazalyq túsinik pen qabilettilikti de ıelenedi. As­tana qalasynyń oqýshylaryna usynylǵan mamandyqtar tizi­min qalyptastyrý kezinde bilim basqarmasy elordamyzda suranysqa asa ıe mamandyqtar men Memleket basshysynyń «Qazaqstannyń áleýmettik jańǵyrtylýy: Jalpyǵa Or­taq Eńbek Qoǵamyna qaraı 20 qadam» maqalasynda atap ótil­gen áleýmettik jańǵyrtý qaǵı­dalaryna arqa súıeıdi.Osynyń arqasynda, Astana qalasynyń oqýshylary tegin jáne óz tańdaýy boıynsha shashtaraz-sheber, elektrondy-esepteý mashınalary operatory, tiginshi, hatshy-referent, bala kútýshi, barmen, daıashy syndy mamandyqtar boıynsha kýrstar bitirgeni týraly kýálik alady»,-delingen maqalada. Bul týraly tolyǵyraq «Bilim berý isindegi mańyzdy mindetter» atty maqaladan oqı alasyzdar.

***

Al, «Aıqyn» respýblıkalyq basylymynyń habarlaýynsha, Kúlásh Ahmetovanyń «Meniń sáýleli sátterim» atty ki­taby jaryq kórgen. Qazaqstan Respýb­lı­kasy memlekettik syılyǵynyń ıegeri Kúlásh apamyzdyń bul kitabyna ádebıet maıtalmandarynyń aqyn shyǵarma­shy­lyǵy týraly ár jyldary jazǵan pikirleri jáne aqynnyń suhbattary men maqa­lalary jınaqtalǵan. Ádebıet synshysy Táken Álimqulov: «Kúláshtyń poezııalyq otaýynda tól jıhaz, eńbektiń tyrnaqaldy tabysy bar. Onyń aqyndyq baǵdaryn tanytatyn da osyndaı dúnıelikter. Tóńirekti óz kózi­men kóre bilý, peshenege bitken daýyspen shyrqaý, oń jambasqa keletin taqyryp tabý - tvorchestvonyń nanymdylyǵyna, utymdylyǵyna ákelip soǵatynyna
Kú­lásh­tiń shyǵarmashylyǵy tolyq dálel» dep baǵa bergen eken. Bul týraly tolyǵyraq «Aıqyn» gazetinde búgin jaryq kórgen «Meniń sáýleli sátterim» atty maqaladan oqı alasyzdar.

Sonymen qatar, «Aıqyn» gazeti 23 aqpanda Astanada bokstan áıelder arasyndaǵy álem chempıonaty bastalatynyn habarlap otyr.

Osy jarys barysynda 10 salmaq dárejeleri boıynsha júldeler jıyntyǵy sarapqa salynady. Sonymen qatar, 51 keli, 60 keli jáne 75 keli salmaqtarda jeńis tuǵyryna kóterilgen bylǵary qolǵap sheberleri jazda Brazılııanyń Rıo de Janeıro qalasynda alaýy tutanatyn Olımpıada oıyndarynda baq synaý múmkindigine ıe bolady.Bul týraly tolyǵyraq «Arýlar Astanada aıqasady» degen maqaladan oqı alasyzdar.

***

«Kazahstanskaıa pravda» gazeti Rıdder qalasynda erlik kórsetken Ivan Balakın men Konstantın Solovev atty eki azamat týraly jazady. Olar órtenip jatqan úıden eki balany qutqarǵan eken. «Tańerteń erte jumysqa bara jatqan bul eki azamat úılerdiń birinen shyǵyp jatqan qoıý tútindi baıqap qalady. Olar qaladaǵy №32 úıdiń janyna barǵanda úıdiń shatyry men aldyńǵy esigi órtenip jatqanyn kóredi. Jylaǵan qyz balanyń daýysyn estigen olar dereý úıdegi adamdardy qutqarýǵa kirisedi. Osylaısha, olar qalyń tútin arasynan bes jastaǵy Zahara jáne úsh jasar Sofıa esimdi qyz balalardy qutqaryp alady»,-dep jazaly basylym. Bul týraly gazettiń búgingi sanynda jaryq kórgen «Vyneslı malysheı ız ognıa» atty maqaladan oqı alasyzdar.