Qul-Muhammed: BQO-da memlekettik baǵdarlamalar tabysty oryndalýda

ORAL. QazAqparat - Batys Qazaqstan oblysynda memlekettik tapsyrmalar tabysty oryndalýda. Bul týraly óńirge jumys sapary kezinde «Nur Otan» partııasy tóraǵasynyń birinshi orynbasary Muhtar Qul-Muhammed málim etti, dep habarlaıdy «QazAqparat» tilshisi.

Sapar barysynda oblys ákimi Altaı Kólginovpen birge «Kýbleı» JShS, «Steklo-Servıs» JShS syndy irgeli kásiporyndardyń tynys-tirshiligimen tanysqan Muhtar Abrarulynyń aıtýynsha, budan on kún buryn ótken «Nur Otan» partııasy Saıası keńesiniń keńeıtilgen otyrysynda Elbasy respýblıkada júzege asyrylyp jatqan memlekettik, sonyń ishinde «Nurly jol», «Nurly jer», Údemeli ındýstrıaldy-ınnovatsııalyq damý baǵdarlamasy syndy prezıdenttik baǵdarlamalardyń oryndalýyna baqylaýdy kúsheıtý jóninde naqty tapsyrma bergen. Osyǵan baılanysty «Nur Otan» partııasy tóraǵasynyń birinshi orynbasary óńirlerdi aralaý ústinde.

Bir ǵana Údemeli ındýstrıaldy-ınnovatsııalyq damý» baǵdarlamasy aıasynda tek Batys Qazaqstan oblysynyń ózine 340 mlrd astam teńge qaralǵan. Mundaı kólemdegi qarjy bul óńirge eshqashan bólingen joq. Bul qarajat oblystyń ındýstrıaldyq kelbetin ózgertti.  ıAǵnı, óńirde 30-dan astam jańa kásiporyn ashylyp, elimizdiń órkendeýine óz úlesterin qosýda. Solardyń biri - osy saparymyzda jumysymen tanysqan «Steklo-Servıs» JShS. Búginde ónimderiniń jartysyn eksportqa shyǵaryp otyrǵan kásiporyn kezinde óz jumysyn áınek kesýden bastaǵanyna sený qıyn.

«Batys Qazaqstanda 1 mln astam qoı, 500 myńnan astam iri qara bar jáne olardyń birazy etti baǵyttaǵy asyl tuqymdy maldar. Al olardyń ónimderin ótkizý bizge kúni keshege deıin kúrdeli másele boldy. Memlekettik baǵdarlamalar aıasynda «Kýbleı» JShS sekildi kásiporyndar aıaǵynan tik turyp, ol ónimderdi tıisti standartqa saı óńdep, shetelge shyǵarýda. Búginde básekege qabiletti bolyp tabylatyn osyndaı kásiporyn elimizde az emes. Elbasynyń ekonomıkany ártaraptandyrý degeniniń bir kórinisi osy. Al toqsanynshy jyldardaǵy Oral qandaı endi? Jol sapasy syn kótermeıtin. Al qazir qalada da, aýdandarǵa aparar joldar da túzelip keledi. Mektepter eski, birazy apatty jaǵdaıda boldy  ári oqýshylar syımaı, keıbiri úsh aýysymda oqydy. Búginde Aq Jaıyq óńirinde apatty jaǵdaıda turǵan birde-bir mektep joq. Olardyń bári prezıdenttik «100 mektep, 100 aýrýhana» baǵdarlamasyna sáıkes tolyǵymen sheshildi. Jalpy, Batys Qazaqstan oblysynda da memlekettik baǵdarlamalar óz jemisin berip jatqanyn kórip, rıza boldym», - dedi Muhtar Qul-Muhammed.

Partııa tóraǵasy birinshi orynbasarynyń jumys sapary 22 qarasha kúni de jalǵaspaq.