Quqyq organdarynyń qyzmetkerleri jemqorlyq qylmysy úshin qatań jaýapkershilikke tartylýy tıis – Alık Shpekbaev
«Halyq únine qulaq asatyn memleket» tujyrymdamasyn dáıekti iske asyrý sybaılas jemqorlyqqa qarsy jumysty jandandyrdy. Koronavırýs indeti is júzinde memlekettik basqarýdyń ártúrli salalaryndaǵy, atap aıtqanda densaýlyq saqtaý salasynan bastap tsıfrlandyrýǵa deıin sozylmaly sybaılas jemqorlyq «indetteriniń» betin ashty. Sondyqtan Memleket basshysy bıyl 19 tamyzda Qazaqstannyń sybaılas jemqorlyqqa qarsy saıasatyn odan ári jańǵyrtý jóninde arnaıy keńes ótkizdi. Onyń negizgi tezısteri keshegi Joldaýdyń jeke blogyna kirdi», - dedi ol.
Osy rette agenttik basshysy Prezıdenttiń sybaılas jemqorlyqqa qarsy reformalary úshinshi paketiniń asa mańyzdy bastamalaryna qysqasha toqtaldy.
«Birinshiden – sybaılas jemqorlyq úshin jaýapkershilikti kúsheıtý. Eń aldymen, bul – quqyq qorǵaý organdarynyń qyzmetkerleri men sýdıalarǵa qatysty. Meniń oıymsha, olar zańdylyq pen quqyqtyq tártipti saqtaı otyryp, sybaılas jemqorlyq qylmystary úshin qatań jaýapkershilikke tartylýy tıis. Para berýshiler men deldaldar úshin paraqorlyq jazasyn qatańdatý máselesi pysyqtalady. Sottalǵan jemqorlarǵa qatysty merziminen buryn shartty túrde bosatýdyń kúshin joıý eń qýatty profılaktıkalyq áserge ıe bolady. Osy tájirıbeniń jalǵasy retinde biz asa aýyr sybaılas jemqorlyq qylmystary úshin birneshe eselengen aıyppul qoldanýdy jáne jemqorlarǵa kolonııa-qonystarda taǵaıyndalǵan jazany qaıta qaraýdy joıýdy jaqtaımyz», - dedi Alık Shpekbaev.
Onyń atap ótýinshe, ekinshiden – 2021 jyldan bastap memlekettik qyzmetshiler, depýtattar men sýdıalar úshin shetelde bank shottaryn ıelenýge tyıym salýdy engizý. Bul bastama el múddesi úshin qyzmet etý ıdeologııasy turǵysynan ǵana emes, jemqorlyq kapıtalyn shetelge shyǵarý múmkindikterin joıý maqsatynda da mańyzdy.
«Úshinshiden – meniń oıymsha, «Qoǵamdyq baqylaý týraly» Zańnyń qabyldanýy azamattar men úkimettik emes uıymdardy sybaılas jemqorlyq pen bıýrokratııaǵa qarsy júıeli túrde áreket etýge barynsha keń aýqymda tartýǵa naqty serpin beredi. Onda san qyrly máseleler boıynsha qoǵam ókilderiniń memlekettik organdarmen ózara árekettesýdiń naqty tetikteri kórinis tabatyn bolady. Antıkor ázirlegen Ashyq bıýdjetterdiń ınteraktıvti kartasy memlekettik organdardyń ashyqtyǵyn qamtamasyz etýdiń negizgi quraly bolý arqyly alǵa qadam baspaq. Budan basqa, memlekettik organdardyń janynda ǵana emes, ulttyq kompanııalarda da jumys isteıtin qoǵamdyq keńesterdiń róli edáýir kúsheıetin bolady. Úzdik sheteldik tájirıbeler negizinde sybaılas jemqorlyq faktileri týraly aqparat berýshilerdi qorǵaýdyń keshendi júıesin ázirleý azamattyq qoǵamdy jandandyrýdyń mańyzdy quraly bolmaq», - dedi agenttik tóraǵasy.