Quqyq qorǵaýshy Áltaev týraly: Sot durys sheshim qabyldady

ASTANA. QazAqparat – Sottyń «Muqalmas» respýblıkalyq qoǵamdyq birlestiginiń Nurjan Áltaevti prezıdenttikke kandıdat etip usyný týraly hattamasyn jaramsyz dep tanýy durys. Mundaı pikirdi «Ádil saılaý úshin» shtabynyń múshesi, zańger Ermek Ábdirasylov bildirdi, dep habarlaıdy QazAqparat tilshisi.

«Menińshe, sot durys sheshim qabyldady. Onda (sotta) qajetti barlyq materıal bar. Qoǵamdyq birlestikterdiń jınalysy qalaı ótýi tıistigi, qansha adam qatysý kerektigi, fılal ókildikteriniń qandaı paıyzy sol jınalysqa qatysýy qajettigi jazylǵan jarǵy bar. Mendegi aqparatqa sáıkes, fılıaldar usynǵan ókilderdiń sany tolyq qatysqan joq. Al jınalysqa keminde 40 adam qatysýy tıis edi. Beınejazbadan ne bári 17 adam qatysqany anyqtaldy. 11-i qarsy shyǵyp, altaýy Áltaevtyń kandıdatýrasyn usynýdy jaqtap daýys berdi. Demek, sot sheshimimen zańnama talaby oryndalyp otyr», - dedi zańger.

Sonymen qatar ol qoǵamdyq birlestikter jarǵyǵa sáıkes jınalys ótkizýi kerektigin basa aıtty.

«Eger olar aıtqan faktilerge saı kelmeıtin málimetter usynatyn bolsa, onda sot basqa qandaı sheshim shyǵarýy kerek?! Menińshe, hattama shyndyqqa saı kelmeıtini anyq. Sot zańdy sheshim qabyldady dep sanaımyn», - dedi Ermek Ábdirasylov.

Eske salsaq, Ortalyq saılaý komıssııasy 7 qazan kúni prezıdenttikke úmitker retinde usynylǵan Nurjan Áltaevtiń qujattary burmalaný faktisine tekserilip jatqanyn málim etken edi.

Al 12 qazanda «Muqalmas» birlestigi Nurjan Áltaevtyń saılaýǵa túsýine qarsylyq bildirip sotqa júgingeni habarlandy.

Búgin Astana soty «Muqalmas» respýblıkalyq qoǵamdyq birlestigi otyrysynyń Nurjan Áltaevti prezıdenttik kandıdat etip usyný týraly hattamasyn jaramsyz dep taný týraly talapty qanaǵattandyrdy.