Quqyq qorǵaý organdarynyń qyzmetkerleri qabyldaıtyn ant mátini ózgeredi

NUR-SULTAN. QazAqparat - Quqyq qorǵaý, azamattyq qorǵaý organdary men memlekettik feldegerlik qyzmet jumyskerleriniń ant berý qaǵıdalaryna ózgeris engizilýi múmkin. Bul týraly Bas prokýratýranyń qaýlysy Ashyq normatıvtik-quqyqtyq aktiler saıtynda jarııalandy, dep habarlady QazAqparat.

Qujatqa sáıkes, endi atalǵan qyzmetterdi atqaratyn azamattar kelesi mátin boıynsha ant qabyldaıdy:

Men, __________ (tegi, aty, ákesiniń aty) Qazaqstan Respýblıkasynyń quqyq qorǵaý organdaryna, azamattyq qorǵaý organdaryna, memlekettik feldegerlik qyzmetine qyzmetke kire otyryp:

- óz halqyna adal qyzmet etýge, Qazaqstan Respýblıkasynyń Konstıtýtsııasy men zańdaryn qatań saqtaýǵa jáne óziniń barlyq is-áreketterinde zańdylyq pen ádilettilik qaǵıdattaryn ustanýǵa tıis;

- ózime júktelgen mindetterdi adal oryndaýǵa jáne adamnyń jáne azamattyń quqyqtary men bostandyqtaryn, qoǵam men memlekettiń múddelerin qylmystyq jáne ózge de quqyqqa qarsy qol suǵýshylyqtardan qorǵaý úshin barlyq kúsh-jiger men bilimdi jumsaýǵa;

- moraldyq tazalyqtyń, qarapaıymdylyqtyń úlgisi bolýǵa, óziniń kásibı abyroıyn, Qazaqstan Respýblıkasynyń quqyq qorǵaý organy, azamattyq qorǵaý organy jáne memlekettik feldegerlik qyzmet qyzmetkeriniń joǵary ataǵyn qadirleýge;

- qyzmetke baılanysty qıyndyqtarǵa laıyqty tótep berýge ant etemin.

- Antty buzý Qazaqstan Respýblıkasynyń zańdarynda belgilengen jaýaptylyqqa ákep soǵatynyn uǵynamyn.

Anttyń jańa mátinin bekitý týraly qaýly 23 tamyzǵa deıin ashyq talqylaýǵa shyǵarylǵan. Keıin qol qoıý úshin Prezıdentke joldanady.