Quqyq qorǵaý organdary akademııasynda prezıdenttik rezervti daıarlaý kýrstarynyń alǵashqy legi aıaqtaldy
Bas Prokýrordyń birinshi orynbasary Iogan Merkel is-sharany ashyp, oqytý kýrstarynyń mańyzdylyǵyn, basshylyq qyzmetke taǵaıyndalý kezinde kýrstan ótý mindetti shart bolyp tabylatynyn atap kórsetti.
Akademııa rektory Ulan Baıjanov baıandamasynda oqytý nátıjesine jáne oqý protsesiniń ereksheligine toqtaldy.
Prezıdenttik rezerv Memleket basshysynyń jańa formatsııadaǵy basshylyqty - kóshbasshylar men zamanaýı menedjerlerdi qurý boıynsha alǵa qoıǵan mindetterin oryndaýda iske asyrylatyn erekshe memlekettik joba bolyp tabylady. Oqytýdyń basty maqsaty - basqarý quziretin jáne ujymǵa tıimdi basshylyq jasaýdyń kásibı daǵdylaryn jetildirý, bolashaq basshylarǵa qajetti qarym-qatynas qasıetterin damytýǵa negizdeledi.
Oqytýdyń alǵashqy aǵymynan Prezıdenttik rezervte turǵan oblys prokýrorlarynyń orynbasarlary, ishki ister organdarynyń jáne sybaılas jemqorlyqqa qarsy kúres qyzmetiniń basshylary ótti.
Dáris berýshiler retinde belgili ǵalymdar men praktıkter, otandyq jáne halyqaralyq sarapshylar, sonymen qatar Prezıdent ákimshiligi qyzmetkerleri, Bas prokýratýra jáne Qarjy mınıstrliginiń memlekettik kiris komıtetiniń basshylary qatysty.
Tyńdaýshylar kýrsty aıaqtaý týraly sertıfıkat aldy jáne olardyń ishinde úzdikteri, onyń ishinde dáris berýshiler jeke nomınatsııalar boıynsha yntalandyryldy.