Quqyq qorǵaý organdaryndaǵy taǵaıyndaý: jospardan tys polıgrafologııalyq tekserý engiziledi

<p>ASTANA. KAZINFORM &ndash; Búgin Senattyń jalpy otyrysynda &laquo;Qazaqstan Respýblıkasynyń keıbir zańnamalyq aktilerine memlekettik qyzmet máseleleri boıynsha ózgerister men tolyqtyrýlar engizý týraly&raquo; Zańy maquldandy.</p>

Bul qujat Konstıtýtsııalyq Sottyń normatıvtik qaýlylaryn iske asyrýǵa jáne memlekettik qyzmet týraly zańnamany onyń sheshimderinde anyqtalǵan quqyqtyq ustanymdarǵa sáıkes keltirýge, sondaı-aq quqyq qorǵaý, áskerı qyzmet jáne arnaýly memlekettik organdar júıesindegi kadr máselelerin retteý bóliginde zańnamany jetildirýge baǵyttalǵan.

- Atap aıtsaq, zań tıisti negizgi erejeler men novellalardy qamtydy. Birinshiden, quqyq qorǵaý qyzmetinde tsıfrlyq reıtıng (básekege qabilettilik kórsetkishi) engiziledi. Quqyq qorǵaý qyzmetine kandıdattyń tsıfrlyq reıtıngi qyzmetkerlerdi irikteý jáne quqyq qorǵaý organdarynda basshy laýazymdarǵa usyný kezinde eskeriledi. Ekinshiden, «Quqyq qorǵaý qyzmeti týraly» zańynan quqyq qorǵaý organdary basshylyǵynyń Prezıdenttik rezervi, quqyq qorǵaý organynyń kadrlyq rezervi týraly, sondaı-aq quqyq qorǵaý organdary qyzmetkerleriniń qyzmetin baǵalaý týraly normalar alynyp tastalady. Atalǵan ınstıtýttardy joıý Memleket basshysynyń Prezıdenttik jáne kadrlyq rezervterdi basshylyq laýazymdarǵa kandıdattardyń tsıfrlyq reıtıngisine aýystyrý týraly tapsyrmasymen negizdeledi. Úshinshiden, qoldanystaǵy zań boıynsha josparly negizde 5 jylda 1 ret júzege asyrylatyn quqyq qorǵaý organynda basshy laýazymdy atqaratyn qyzmetkerlerdi rotatsııalaý merzimi 3 jylda 1 ret ótkizý merzimine ózgertiledi, - dedi senator Murat Qadyrbek.

Onyń aıtýynsha, qyzmetkerdi quqyq qorǵaý organdarynda joǵary turǵan basshylyq laýazymǵa ósirý máselesin sheshý úshin jospardan tys attestattaý jáne polıgrafologııalyq zertteý engiziledi. Quqyq qorǵaý organynyń qyzmetkerin attestattaýdyń mindetti kezeńi retinde psıhologııalyq-áleýmettik zertteý júrgizý qosylady.

- Quqyq qorǵaý organy qyzmetkerin attestattaý kezeńi retinde polıgrafologııalyq zertteý engiziledi, ol quqyq qorǵaý organy basshysynyń sheshimi boıynsha júrgiziledi. Memlekettik ákimshilik qyzmetke qabyldaý kezindegi shekteýlerdiń negizderi men merzimderi aıqyndalyp, sondaı-aq memlekettik saıası jáne ákimshilik qyzmetshilerdiń memlekettik qyzmetti toqtatýynyń negizderi naqtylanyp, tutastaı alǵanda olardy quqyqtyq retteý tetikteri jetildiriledi, - dedi depýtat.

Tutastaı alǵanda zańnyń qabyldanýy quqyq qorǵaý organdarynda kadrlyq úrdisterdi tsıfrlandyrý boıynsha jumys júrgizýge, olardaǵy basshylyq laýazymdardy rotatsııalaýdyń biryńǵaı tártibin belgileýge, sondaı-aq quqyq qorǵaý jáne arnaýly memlekettik organdardyń basshy laýazymdaryna kandıdattardy irikteý tetigin jetildirýge múmkindik beredi.

Ulttyq statıstıka bıýrosy halyqtyń quqyq qorǵaý organdaryna jáne sot júıesine senimdilik deńgeıin zerttegen bolatyn.