Kúdiktini ızolıatorǵa qamamaı turyp dene jaraqaty bar-joǵyn tekseremiz - ІІM

NUR-SULTAN. QazAqparat – Qańtardaǵy tártipsizdik kezinde tonaýǵa qatysqan adamdardy anyqtaý jalǵasyp jatyr. Bul týraly ІІM tergeý departamentiniń bastyǵy Sanjar Ádilov aıtty, dep habarlaıdy QazAqparat tilshisi.

«Urlyq pen tonaý, onyń ishinde jappaı tártipsizdik kezinde qarý urlaý faktisi boıynsha 322 kúdikti ustalyp, ýaqytsha ustaý ızolıatoryna qamaýǵa alyndy. Tergeý barysynda basty nazar istiń mán-jaıy men kúdiktilerdiń dálelderin muqııat tekserýge, dáleldemeler jınaýǵa aýdarylady. Buryn habarlanǵandaı, tergeýshilerdiń búkil is júrgizý sheshimderi, atap aıtqanda, kúdiktini qamaýǵa alý, onyń áreketterin saralaý, sondaı-aq bultartpaý sharalaryn tańdaý qylmystyq protsestiń úsh býyndy modeli aıasynda qabyldanady. Prokýrormen kelisiledi», - dedi ol ortalyq kommýnıkatsııalar qyzmetindegi brıfıng barysynda.

Onyń atap ótýinshe, búkil kúdiktiler medıtsınalyq kýálandyrý arqyly dene jaraqatynyń bar-joǵyn anyqtaý úshin tekseriledi.

«Dene jaraqaty bolǵan jaǵdaıda onyń mán-jaıy anyqtalǵannan keıin ǵana ýaqytsha ustaý ızolıatoryna qamalady», - dedi departament bastyǵy.