Kúdiktiden jarty mıllıon teńge para alǵan polıtseılerdiń ózderi kúdikke ilindi

NUR-SULTAN. QazAqparat - Almaty qalasy Medeý aýdandyq polıtsııa basqarmasynyń tergeý bólimi bastyǵynyń mindetin atqarýshy para alý kúdigine ilikti. Bul týraly QR Sybaılas jemqorlyqqa qarsy is-qımyl agenttiginiń tergeýshisi Qaısar Barjaqsynov aıtty, dep habarlaıdy QazAqparat tilshisi.

Onyń sózine qaraǵanda, Almaty qalalyq sybaılas jemqorlyqqa qarsy qyzmeti qalalyq polıtsııa departamentiniń ózindik qaýipsizdik basqarmasymen birlesken is-shara júrgizgen. Shara barysynda Medeý aýdandyq polıtsııa basqarmasynyń tergeý bólimi bastyǵynyń mindetin atqarýshy men oǵan baǵynyshty tergeýshi sybaılas jemqorlyq qylmysyn jasaǵany úshin ustalǵan.

«Olar laýazymdy tulǵa bola otyryp, ózderiniń qaraýyndaǵy urlyq týraly qylmystyq is boıynsha kúdiktiden qylmystyq qýdalaýdy toqtatqany úshin 500 000 teńge kóleminde para aldy degen kúdikke ilinip otyr. Kúdiktiler óz kinásin tolyq moıyndady», - dedi agenttik tergeýshisi.