«Qudaıtaný baıany» oqýlyǵynyń qazaq tiline aýdarylýy jaqsy bastama - Keńshilik Tyshqan

ASTANA. QazAqparat - Karen Armstrongtyń «Iýdaızm, hrıstıandyq pen ıslamdaǵy 4000 jyldyq izdenis: Qudaıtaný baıany»  oqýlyǵynyń qazaq tiline aýdarylýy jaqsy bastama. Mundaı pikirdi L.Gýmılev atyndaǵy Eýrazııa ulttyq ýnıversıteti dintaný kafedrasynyń meńgerýshisi Keńshilik Tyshqan bildirdi, dep habarlaıdy QazAqparat.

«Jańa gýmanıtarlyq bilim. Qazaq tilindegi 100 jańa oqýlyq» jobasy aıasynda aýdarylatyn kitaptar tizimine Karen Armstrongtyń «Iýdaızm, hrıstıandyq pen ıslamdaǵy 4000 jyldyq izdenis: Qudaıtaný baıany»  engizilip, alǵashqy lekpen qazaq tilinde jaryq kórip otyr. Árıne, dintaný salasyndaǵy oqýlyqtardyń tapshy ekendigin nazarǵa alatyn bolsaq, muny jaqsy bastama dep esepteýge bolady.   Jalpy búkil dintanýdyń problemasyn qudaı tarıhymen nemese bir kitappen sheshý qıyn», - dedi ol.

Degenmen, onyń aıtýynsha, eýropalyq deńgeıdegi Qudaıtaný túsiniginiń qazaq tilinde jaryq kórýi durys. Óıtkeni, bul kitap Eýropadaǵy ıslamdyq jáne hrıstıandyq ilimmen jete tanysýǵa múmkindik beredi.

«Muny qazaq tiline aýdarylýǵa tıisti birden-bir oqýlyq dep aıtýǵa qıyndaý. Degenmen bul osy saladaǵy irgeli eńbekterdiń ishinen iriktep alyndy. Oqýlyqty salanyń bilikti mamandary aýdarǵany kórinip tur, tili jatyq, sóılemderi oıǵa qonymdy. Aýdarýshylary osy salada uzaq jyldar boıy eńbek etip, naǵyz mamanǵa aınalǵan  bilgirler, ıaǵnı ǵylym doktory, kandıdattar. Sondyqtan olardyń bul salanyń qyr-syryn biletin, túıtkildi máselelerin  jaqsy túsinetin maman ekendigine esh kúmán keltire almaımyz», - dedi Keńshilik Tyshqan.  

Aıta keteıik, búgin L.Gýmılev atyndaǵy Eýrazııa ulttyq ýnıversıtetinde «Rýhanı jańǵyrý» baǵdarlamasynyń ortalyq sarapshylyq keńesiniń otyrysy ótip, onda «Jańa gýmanıtarlyq bilim. Qazaq tilindegi 100 jańa oqýlyq» jobasy aıasynda jaryq kórgen oqýlyqtar talqylandy.