Qudasy qudaǵıyn 5 jylǵa sottatyp jibergen

ASTANA. QazAqparat - Joǵarǵy sot qudasy 5 jylǵa sottatyp jibergen qudaǵıdy aqtap aldy. Bul týraly búgin  respýblıkalyq sýdıalardyń keńeıtilgen keńesinde  QR Joǵarǵy sotynyń tóraǵasy Jaqyp Asanov aıtty, dep habarlaıdy QazAqparat tilshisi.

«Qyzylordada eki jas ajyrasyp, qudalardyń arasynda arazdyq paıda bolǵan. Keshegi qudalar bir-birimen aıtysa bastaǵan. Bir jaǵynyń jaǵdaıy jaqsy bolýy kerek. Sol ekinshisine «men seni qurtamyn» deıdi. Sóıtip baryn salyp, tanystaryn salyp, organdardy tartyp, burynǵy qudaǵıyn 5 jylǵa sottatady. Qalalyq sot ta, oblystyq sot ta kóz jumyp qaraǵan. Osy isti jaqynda Joǵarǵy sotta qarap, ol kisini aqtadyq», - dedi Jaqyp Asanov.

Onyń aıtýynsha, sol isti qaraǵan tergeýshiniń ózi sottalyp ketken. Óıtkeni ol jalǵan jaýaptar jazǵan.

«Odan kim utty? Jastar ajyrasty, qudalar birin-biri kórmeske aınaldy. Sotqa bergen jaq abyroıdan aıyryldy, uıatqa qaldy. Qıt etse «sotqa beremin, qurtamyn, joıamyn» deıtin jaǵymsyz ádet áli de bar. Ol qara basyn oılaǵan, mádenıeti tómen adamdarǵa tán qylyq. Naǵyz jónsizdik, ádepsizdik. Tipti kórgensizdik dep te aıtýyma bolady. Odan jastarǵa qandaı úlgi, qandaı ónege?», - dedi Joǵarǵy sot tóraǵasy.

Aıta keterligi, Jaqyp Asanov sýdıalardy reıderlik syzbalarǵa paıdalanatyndyǵyn da naqty mysaldarmen aıtyp bergen bolatyn.