Qubyrlardan alynǵan aýyz sý synamasynyń 3,9%-y sanıtarlyq talapqa saı kelmedi - mınıstrlik

ASTANA. QazAqparat – Byltyrǵy zertteý boıynsha qubyrlardaǵy aýyz sýdyń 3,9%-y sanıtarlyq talapqa sáıkes kelmeıdi. Bul týraly Indýstrııa jáne ınfraqurylymdyq damý mınıstrligi ashyq talqyǵa shyǵarǵan «2023-2029 jyldarǵa arnalǵan turǵyn úı-kommýnaldyq ınfraqurylymyn damytý tujyrymdamasynda» jazylǵan, dep habarlaıdy QazAqparat tilshisi.

Tujyrymdamada eldiń qazirgi ınfraqurylymyna taldaý jasalyp, máseleler kórsetilgen. Solardyń biri – aýyz sýdyń sapasy.

«Qaýipsiz sý qory, gıgıena jáne sanıtarııa, sondaı-aq sý resýrstaryn tıimdi basqarý búkil álemdegi adamdardyń densaýlyǵy úshin mańyzdy. Sanıtarııalyq-epıdemıologııalyq baqylaý salasyndaǵy ýákiletti organnyń derekteri boıynsha byltyr sý qubyry sýynyń 26 670 synamasy sanıtarııalyq-hımııalyq kórsetkishterge zertteldi. Onyń ishinde 1 028 nemese 3,9%-ynyń talapqa sáıkes kelmeıtini anyqtaldy. Sondaı-aq, 2022 jyly mıkrobıologııalyq kórsetkishterge 28 764 sý synamasy zertteldi. Onyń ishinde 646 nemese 2,4%-y normalarǵa sáıkes kelmeıdi», - delingen tujyrymdamada.

Indýstrııa mınıstrliginiń dereginshe, elimizde sýdy jınaý, óńdeý qyzmetterin kórsetetin 558 kásiporyn bar. Olardyń ishinde 155-i (27,8 %) memlekettik kommýnaldyq menshikte bolsa, 403-i (72,2%) – jeke.

Vedomstvo bul máselelerdiń sheshimi retinde «2023-2029 jyldarǵa arnalǵan turǵyn úı-kommýnaldyq ınfraqurylymyn damytý tujyrymdamasyn» bekitýdi usynady. Onda qalalar men eldi mekenderdi aýyz sýmen qamtamasyz etý, onyń sapasyn jaqsartý boıynsha keshendi sharalar qarastyrylǵan.

Qujat 15 naýryzǵa deıin kópshilik talqylaýda bolady.