Qubyrda qalǵan munaıdy Qazaqstan men Reseı qalaı bóldi

ASTANA. QazAqparat - Parlament Senatynyń Ekonomıkalyq saıasat, ınnovatsııalyq damý jáne kásipkerlik komıtetiniń keńeıtilgen otyrysynda Qazaqstan men Reseı arasynda munaıdy bóletin zań jobasy talqylandy, dep habarlaıdy QazAqparat.

Atap aıtqanda, KSRO kezinde elimizdiń magıstraldyq munaı qubyrlar jelisi biryńǵaı júıede bolatyn. Biraq keńes úkimeti taraǵannan keıin qubyrlar ár memlekettiń aýmaqtyq qaǵıdaty boıynsha bólingen bolatyn.

«Osy oraıda, «Týımazy-Omby-Novosibir-2» (TON-2) munaı qubyrynyń Qazaqstan bóligindegi 62 048 tonna tehnologııalyq munaıdyń menshik quqyǵy aıqyndalmaı qalǵan. Sonymen qatar, «Omby-Pavlodar» qubyrynyń reseılik ýchaskesinde 141 728 tonna tehnologııalyq munaıdyń menshigi de sheshilmegen edi. Biraq atalǵan munaı aýmaqtyq qaǵıdatqa naqty tapsyrylmasa da, Reseıdiń «Transneft» jarııa aktsıonerlik qoǵamy men qazaqstandyq «QazTransOıl» kompanııasynyń balansyna berilgen bolatyn.  ıAǵnı, «Omby-Pavlodar» qubyrynyń reseılik ýchaskesindegi 141 728 tonna munaı shyn máninde «QazTransOıl» AQ balansynda, al TON-2 qubyrynyń Qazaqstan aýmaǵyndaǵy 62 myń tonnasy «Transneft» qaramaǵynda qaldy», - dedi Energetıka vıtse-mınıstri Maǵzum Myrzaǵalıev.

Onyń sózine qaraǵanda, 2017 jyldyń 9 qarashasynda jasalǵan Qazaqstan men Reseı úkimetteriniń arasyndaǵy TON-2 jáne «Omby-Pavlodar» magıstraldyq munaı qubyryndaǵy tehnologııalyq munaıdyń mártebesin aıqyndaý týraly kelisim eki el arasyndaǵy kóp jyldyq jumystyń nátıjesi.

Tehnologııalyq munaıdy qaıtarýda rásimderdi jeńildetý maqsatynda atalǵan kelisimmen: birinshiden, Qazaqstan aýmaǵynda ornalasqan TON-2 magıstraldyq munaı qubyryndaǵy 62 048 tonna «QazTransOıl» AQ-ǵa tıesili; ekinshiden, Reseı ýchaskesinde jatqan «Omby-Pavlodar» qubyryndaǵy munaıdyń dál sol kólemi (62 048 tonna) «Transneft-Ýralǵa» tıesili bolady; úshinshiden, reseılik ýchaskedegi «Omby-Pavlodar» qubyryndaǵy munaıdyń 79 680 tonnasy «QazTransOıl» kompanııasyna tıesili bolyp bekitilgen.

Sonymen qatar, kelisim kúshine engen kúnnen bastap, qos tarap 10 aı ishinde «QazTransOıl» AQ-ǵa tıesili 79 670 tonna munaıdy qubyr arqyly Reseı aýmaǵynan Qazaqstanǵa birneshe partııamen jóneltýi qajet. Osylaısha, bul kelisim qubyrlardaǵy munaıdyń atalǵan uıymdarǵa tıesili ekendigin zańdy túrde aıqyndaıdy.

Talqylaýdan keıin komıtet músheleri «QR Úkimeti men RF Úkimeti arasyndaǵy «Týımazy-Omby-Novosibir-2» jáne «Omby-Pavlodar» qubyrlaryndaǵy tehnologııalyq munaıdyń mártebesin aıqyndaý týraly kelisimdi ratıfıkatsııalaý týraly» zań jobasyn Senattyń jalpy otyrysyna shyǵarý sheshimin qabyldady.