Qubyrdaǵy aqaý: Maıqaıyńdaǵy rezervýarda eki táýlikke jetetin sý bar

<p>PAVLODAR. KAZINFORM &mdash; Maıqaıyń kenti men &laquo;Bogatyr-Kómir&raquo; AQ-na sý jetkizetin magıstraldy qubyrda anyqtalǵan aqaýdy joıý jumystary áli jalǵasyp jatyr. Jóndeý jumysyna 95 adam jumyldyrylǵan.</p>

Pavlodar oblysy ákiminiń baspasóz qyzmetinen habarlaǵandaı, 1020 mm-lik qubyrdaǵy zalaldy qalpyna keltirýge «Ekibastuz qalalyq sý arnasy» MKK, «Shyǵys» kenishi, «Injenerlik jeliler» JShS jáne «Maıqaıyń-altyn» AQ men Pavlodar oblysy tótenshe jaǵdaılar departamentinen mamandar tartylǵan.

Barlyǵy 95 adamnan turatyn 10 brıgada jáne 40 arnaıy tehnıka jumyldyryldy. 

— Qubyrdyń tórt jerinde sýdyń yqtımal qatýyn jáne aýa jınalyp qalýyn anyqtaý úshin jer qazylyp jatyr. Taǵy 11 ýchaskede qubyrlardy ashý jumystary jalǵasýda. Qosymsha 2 brıgada Maıqaıyń kentindegi sýdyń aǵýyn anyqtap, qysymyn ólshep jatyr. Qazir kentke sý tómen qysymda berilgen, -dep málimdedi óńir ákiminiń baspasóz qyzmetinen.

Belgili bolǵandaı, Maıqaıyńda kólemi 10 000 tekshe metr bolatyn rezervýarda 2 táýlikke jetetin sý qory bar.

Ony 231 jeke turǵyn úı, 58 kópqabatty turǵyn úı jáne 71 zańdy tulǵa paıdalanýda.

Sýdy syrttan tasyp jetkizý arqyly rezervýar turaqty túrde tolyqtyrylyp otyr.

Sondaı-aq, turǵyndarǵa aýyzsý men tehnıkalyq sý tsısternaly mashınalar arqyly da tasymaldanýda. Bul jumysqa 10 tehnıka jumyldyrylǵan.

Eske sala keteıik, Ekibastuzdan Maıqaıyń kentine aýyzsý jetkizetin úlken qubyr jaryldy.  

Maıqaıyń kentiniń turǵyndary kúnine 1 myń tekshe metr aýyzsý tutynyp kelgen. Qazir qysymnyń tómendeýine baılanysty «Maıqaıyńaltyn» AQ sý tasıtyn mashınalardy jumyldyrdy.

Qubyrdaǵy aqaýǵa baılanysty «Bogatyr-Kómir» kásipornyna sý berý ýaqytsha toqtatyldy.