Qubyrdaǵy aqaý: Maıqaıyń kentine búgin keshke sý berile bastaıdy

<p>PAVLODAR. KAZINFORM &mdash; Kommýnaldyq qyzmetter jergilikti atqarýshy bılik organdarmen birlesip qubyrlardy jibitý jumystaryn aıaqtady. Qazirgi sátte jelilerdi qysymmen tekserý júrip jatyr.</p>

Ekibastuz qalasynyń ákimi Aıan Beısekın qubyrdaǵy aqaýdy qalpyna keltirý jumystary aıaqtalýǵa jaqyn ekeni týraly habarlady.

«Búgin tańerteń saǵat 07.30-da jergilikti atqarýshy organdar kommýnaldyq mekemelermen birge qubyrlardy qyzdyrý, jibitý jumystaryn aıaqtady. „Ekibastuz qalalyq sý arnasy“ stansadan 274-shi pıketke deıingi jeli boıyn qaıtalaı tekserip ótedi. Qazirgi ýaqytta qubyr sýǵa toltyrylyp, qysymmen tekserý júrgizilýde. Jaqyn ýaqytta „Bogatyr-Kómir“ AQ-na sý buratyn japqyshty ashady», — dep málimdedi ákim.

Qubyrlar toltyrylyp bolǵan soń keshkilik Maıqaıyń kentine sý tolyqqandy jiberile bastaýy múmkin.

Eske sala keteıik, 21 aqpan kúni Ekibastuzdan Maıqaıyń kentine aýyzsý jetkizetin úlken qubyr jarylǵan edi.