Kýbanyń ulttyq telearnasynda Dımash Qudaıbergenniń áni shyrqaldy

NUR-SULTAN. QazAqparat – 29 qyrkúıek kúni qazaqstandyq ánshi Dımash Qudaıbergenniń áni Kýbanyń ulttyq telearnasynyń «De La Gran Escena» («Uly sahnada») baǵdarlamasynda qosyldy, dep habarlaıdy QazAqparat Dimashnews.com-ǵa silteme jasap.

Qazaqstandyq ánshiniń «Olimpico» áni Cubavisión ulttyq telearnasynda «La música, ese placer» («Mýzyka – bul lázzat») bólimin aıaqtady.

Alǵash ret «De La Gran Escena» («Uly sahnada») baǵdarlamasy efırge 1985 jyly shyqqan. Onda ár ýaqyttaǵy tanymal kýbalyq jáne álemdik mýzyka týyndylary kórsetiledi. Baǵdarlamany telearnanyń eń belgili jýrnalısteri júrgizedi.

«Biz kýbalyq Dears-qa alǵys aıtamyz! Olar telearnaǵa habarlasyp, súıikti ártisterin kórsetýin surady. Osynyń arqasynda taǵy kóp adam Dımashtyń shyǵarmashylyǵymen tanysady», - dedi ózderiniń Instagram-akkaýntynda ártistiń kýbalyq tyńdarmandary.

Erterek Dımash Qudaıbergenniń Qytaıǵa qaıtyp oralǵany habarlanǵan bolatyn.