Qýat Jaqanov: Otan qorǵaý – bóriktiniń boryshy

<p>PAVLODAR. KAZINFORM - Jergilikti áskerı basqarý organdarynda er-azamattardy áskerge shaqyrý jumystaryn úılestirý isiniń basy-qasynda júretin qyzmetkerlerdiń jumysy kópshiliktiń kózinen syrt qalyp jatatyny ras. Otan qorǵaýshylar kúni qarsańynda Pavlodar oblysy qorǵanys isteri jónindegi departamenti qyzmettik isti uıymdastyrý jáne áskerler bóliminiń bastyǵy, podpolkovnık Qýat Jaqanovpen áńgimelesýdiń sáti tústi.</p>

Qýat Tileýqabylulynyń áskerı saladaǵy eńbek ótili 23 jyldan asady.

Qorǵanys salasynyń «otymen kirip, kúlimen shyǵyp», Otan qorǵaý isiniń barlyq uńǵyl-shuńǵylyn jetik meńgergen myqty maman. 

Aqtoǵaı aýdanynyń Jańabet aýylynan túlep ushqan azamat otbasyndaǵy 10 balanyń kenjesi, úıdiń erketotaıy bolǵanyna qaramastan, mektep bitire sala áskerı ómirdi tańdapty.

— 90-shy jyldary ásker kórip kelgender batyr sııaqty kórinýshi edi. Ol kezde keńestik júıe áli de bolsa saqtalǵan ári áskerde bolý ýaqyty 2 jyl bolatyn. Árbirimiz áskerden oralǵan aǵalarymyzdyń áskerı kıimderin, bas kıimderin jarysa, talasa kıip, máz-meıram bolatynymyz da esimizde. Al olardyń áskerde bastan ótkergen qyzyqty oqıǵalaryn estigende aýzymyzdan sý aǵyp, «biz de tezirek áskerge barsaq» dep armandaýshy edik. Osy arman qanat bitirgen bolar, mektep bitirgen soń birden Almatydaǵy qurlyq áskerleri ınstıtýtyna baryp, oqýǵa tústim. Áskerge baryp kelgen soń, qorǵanys salasyndaǵy jumysym keıin elimizdiń kóptegen oblystarynda jalǵasty. Qazirgi Aqsý qalasynda, ózimniń týǵan mekenim — Aqtoǵaı aýdanynda, Baıanaýyl aýdanynda qyzmet atqardym. Keıinirek Aqtóbe oblysynyń Mártók aýdanyndaǵy qorǵanys isteri jónindegi bólimniń bastyǵy, Qaraǵandy oblystyq qorǵanys isteri jónindegi departament bastyǵynyń orynbasary laýazymdaryn abyroımen atqardym. Qazirgi ýaqytta týǵan ólkeme oralyp, osy salada qyzmetimdi jemisti jalǵastyryp jatyrmyn, -dep áńgimeledi ol.

Q.Jaqanov basqaratyn bólim departamenttegi qyzmetkerlerdiń kúndelikti jumysyn, kezekshilik tártibin jáne áskerılerdiń atys qarýyn meńgerýdegi mashyqtaryn únemi jetildirip otyrýǵa negizdelgen.

Bólimniń uıymdastyrýymen mamandar ýaqyt saıyn áskerı jıyndar ótkizip, atys alańyna barady.

Ol jerde AK-74 avtomaty men Makarov tapanshasynan oq atyp, jaýyngerlik daǵdylaryn pysyqtap otyrady.

Ofıtserler men serjanttar quramy, qatardaǵy qyzmetkerler baqylaý normatıvterin tapsyryp, teorııalyq jáne praktıkalyq bilimderin dáleldeýi kerek.

Olardyń dene daıyndyǵy da únemi baqylaýda.

Munyń syrtynda áskerı ekıpırovkalarynyń únemi daıyn turýy, saptyq daıyndyqtar, áskerı taktıka men topografııalyq sabaqtar, taǵysyn-taǵy áskerı mashyqtardyń únemi jetilip, jańartylyp otyrýy asa mańyzdy.

Osyndaı sabaqtar men áskerı syn-emtıhan nátıjesinde qorǵanys salasy qyzmetkerleriniń qyzmettik dárejesi baǵalanady.

— Otanymyz — Qazaqstan jer jaǵdaıy boıynsha álemde 9-orynda tur. Ata-babalarymyz amanat etken ulan-ǵaıyr dalany aman saqtap, táýelsizdigimizdi baıandy etý — er azamattardyń qasıetti boryshy. Bul ár bóriktiniń qasıetti paryzy da. Otan qorǵaýshylar kúninde óz áriptesterim men sala ardagerlerin aıbyndy merekemen quttyqtap, Otanǵa adal, elge qaıyrymdy, otbasyna meıirimdi bolyńyzdar degim keledi. Kók baıraǵymyz máńgilik bolsyn! , -dep tilek tileıdi Qýat Jaqanov.