Qýanysh Sultanov Elbasynyń Joldaýyn cheh Prezıdentine tabys etti

ASTANA. QazAqparat - 25 aqpanda QR Parlamenti Májilisiniń depýtaty Qýanysh Sultanov Memleket basshysynyń arnaıy ýákili retinde Cheh Respýblıkasyna bardy, dep habarlady QR SІM baspasóz qyzmetinen.

Qýanysh Sultanov Praga qalasynda ChR Prezıdenti Mılosh Zemanmen jáne ChR Parlamenti depýtattar Palatasy tóraǵasynyń orynbasary Voıteh Fılıppen (Vojtěch Filip) kezdesti.

Q. Sultanov M. Zemanǵa Qazaqstannyń kandıdatýrasyn 2017-2018 jj. BUU Qaýipsizdik Keńesiniń turaqty emes músheligine ilgeriletý jónindegi Elbasynyń joldaýyn tapsyrdy. Sonymen qatar, arnaıy ýákil aımaqtyq jáne halyqaralyq turaqtylyq pen qaýipsizdikti nyǵaıtý, onyń ishinde ıadrolyq qarýdy taratpaý jáne qarýsyzdandyrý salasyna qosqan Qazaqstannyń úlesin, kópjaqty dıplomatııa salasyndaǵy elimizdiń belsendi qyzmetinen habardar etti. Kezdesýde 2014 j. qarashada Cheh Respýblıkasynyń prezıdenti M. Zemannyń Qazaqstanǵa jasaǵan resmı sapary qorytyndylary boıynsha berilgen tapsyrmalardyń júzege asyrý barysy talqylandy. ChR Parlamenti depýtattar Palatasy tóraǵasynyń orynbasarymen suhbat barysynda taraptar qazaqstan-cheh parlamentaralyq qatynastardyń turaqtylyǵyn atap ótti. Sonymen qatar, QR Parlamenti Májilisiniń Áleýmettik-mádenı damý Komıteti músheleriniń Cheh Respýblıkasyna saparynyń daıyndyǵy talqylandy.