Qýanysh Súleımenov: Mal sharýashylyǵymen aınalysatyn kásipkerlerge jan-jaqty qoldaý kórsetilýde

ÓSKEMEN. QazAqparat – «Qazaqstannyń 100 jańa esimi» jobasynyń jeńimpazy, «Shalabaı» JShS bas dırektory Qýanysh Súleımenovtiń aıtýynsha, Shyǵys Qazaqstanda mal sharýashylyǵymen aınalysyp jatqan kásipkerlerge jan-jaqty qoldaý kórsetilýde, dep habarlaıdy QazAqparat tilshisi.

Bul jaıly ol «Táýelsiz Qazaqstan: Jasampazdyqqa toly jyldar. Shyǵys Qazaqstan oblysynyń basty jetistikteri» atty dóńgelek ústel barysynda aıtty.

«Bıyl el táýelsizdigine 30 jyl tolyp otyr. Tarıh turǵysynan alǵanda bul kózdi-ashyp jumǵansha óte shyǵatyn qas-qaǵym sát. Dese de biz úshin qıyndyǵy men qýanyshy, daǵdarysy men damýy qatar júrgen tutas dáýir boldy. Osy úsh on jyldyqta óńirdiń aýyl sharýashylyǵy salasy aıtarlyqtaı nátıjelerge qol jetkizdi. Kásibin endi bastap jatqan sharýagerlerge memleket tarapynan jan-jaqty qoldaý kórsetildi», - deıdi Qýanysh Súleımenov.

Agroónerkásiptik keshende oblysta aýyl sharýashylyǵynyń jalpy óniminiń kólemi 1991 jylǵy 7,2 mln teńgeden 2020 jyldyń qorytyndysy boıynsha 686,3 mlrd teńgege deıin ósken.

«Ózime qatysty aıtar bolsam, 2000 jyly qarapaıym tarıh pániniń muǵalimi retinde jumys ótilimdi bastaǵan bolatynmyn. Oılana kele qazaqtyń aqbas sıyrynyń otany sanalatyn Jarma aýdanynda sol tuqymdy ósirýdi qolǵa aldym. Árıne, basynda ońaı bolǵan joq. Dese de Qazaqstan ınvestıtsııalyq qorynyń qoldaýymen jumysymyz alǵa basty. Sharýa qojalyǵymyz eldiń órkendeýimen qatarlasa damyp keldi. Osylaısha, 5 adam jumys istegen shaǵyn qojalyq búginde aýqymdy holdıngke aınaldy», - deıdi «Shalabaı» JShS bas dırektory.