Qýańshylyqtan kelgen zalaldy tirkeý sheneýnikterdiń kóńil kúıine baılanysty bolyp otyr – depýtat

ASTANA. QazAqparat – Májilis depýtaty, Respublica partııasy fraktsııasynyń jetekshisi Aıdarbek Qojanazarov Qýańshylyqtan zardap shekken oblystarda TJ rejımin jarııalaýdy usyndy, dep habarlaıdy QazAqparat tilshisi.

«Bıylǵy egis pen sýarý kezeńi Pavlodar, Aqmola jáne basqa da oblystardyń dıqandaryna qıyn tıdi. Jaýyn-shashyn mólsheri normanyń 3-9 paıyzyn ǵana berdi. Pavlodar oblysynyń Sharbaqty jáne Aqtoǵaı aýdandarynda jańbyr jaýǵan joq. Mamyrdan tamyzǵa deıin jańbyrsyz, aptap ystyq aýa raıy boldy. Biz bul máseleni oblys ákimi men ortalyq memlekettik organdar deńgeıinde aıttyq. 8 qyrkúıekte kóptegen fermerlerdiń ótinishterinen soń qaıtadan Pavlodarǵa bardyq. Alqaptarda oblystaǵy jaǵdaıdyń kúrdelengenine jatqanyna kóz jetkizdik», - dedi A. Qojanazarov Májilistiń jalpy otyrysynda.

Depýtattyń aıtýynsha, keı sharýashylyqtarda egistikten 0,3-1 ts/ga astyq jınalýda. Mundaı egindi jınaǵannan góri tastap ketken ońaıyraq. Oǵan qosa, nesıeler boıynsha mindettemelerdi eshkim joıǵan joq.

«Qarajat tapshylyǵy kelesi eginge daıyndyqtyń tıisti deńgeıde júrgizilmeýine ákep soǵady Nesıe boıynsha tólem úzilisteri, qaryzdardy qaıta qarjylandyrý dıqandardyń nesıe tarıhyn buzady, nátıjesinde nesıege qoljetimdilik odan ári qysqarady. Fermerlerge usynylǵan qoldaý sharalary jumys istep jatqan joq: nesıelerdi 3-9 aıǵa keıinge qaldyrý eń jaqsy jaǵdaıda mamyr aıynda, egin egý naýqanynda aıaqtalady. Nesıeni keıinge qaldyrýdyń ózi qıyn protsess: alqaptyń qurǵaqshylyqtan zardap shekkenin qujat júzinde dáleldep, ondaǵan bıýrokratııalyq kedergilerden ótý qajet», - dedi ol.

Bul jaǵdaıda Respublica fraktsııasy qýańshylyqtan zardap shekken oblystarda TJ rejımin jarııalaýdy usyndy.

«Aıqyn nárseni jasyrýdy toqtataıyq: oblys ákimderi klımattyq ózgeristerge áser ete almaıdy, jańbyrdyń jaýmaǵanyna jaýap bermeıdi, demek, qurǵaqshylyq ákimniń sátsizdigi retinde eseptelmeýi kerek. Biraq zalal faktilerin jasyrý, bıznes pen halyqqa kómektesýden bas tartý – atqarýshy bıliktiń tikeleı jaýapkershiligi. TJ rejımin jarııalaý algorıtmin retteý kerek. Tótenshe jaǵdaı – nesıe berýshiler úshin bir jyldan astam merzimge keıinge qaldyrýdyń jalǵyz zańdy múmkindigi bolyp otyr. Alaıda ákimdikter birneshe aı boıy TJ qalaı jarııalaý kerektigin anyqtap, bir orynnan qozǵalmaı, ýaqytyn joǵaltýda. Úkimetten ákimdikter men halyqqa tótenshe jaǵdaı rejımi qalaı, kim jáne qandaı jaǵdaıda jarııalanatynyn bekitýdi, túsindirýdi jáne jetkizýdi suraımyz. Bul aqparatty QR azamattarynyń zańdy quqyǵy dep sanaımyn», - dedi Aıdarbek Qojanazarov.

Sondaı-aq, Úkimet shyǵyndardy belgileý tetigin, onyń ishinde ǵarysh monıtorıngi quraldaryn paıdalana otyryp aıqyndaý qajet.

«Sebebi qazir fermerge kelgen zalaldy tirkeý aýdan ákimdikteri qyzmetkerleriniń kóńil kúıine baılanysty bolyp otyr. Fermerlerge tıesili sýbsıdııany jedel tártippen tóleý kerek. Mysaly, Pavlodar oblysynda sýbsıdııa boıynsha qaryz 7,3 mlrd teńgege jetken. Sharýalarǵa da óz ónimin jaqsy baǵamen satýǵa múmkindik berý kerek. Ol úshin shekteý sharalarynan, sonyń ishinde kúnbaǵys eksportyna baj salyǵynan bas tartýdy usynamyz», - dedi partııa ókili.

Óz kezeginde Májilis tóraǵasy Erlan Qoshanov óńirlerde TJ jarııalaý usynysyna pikir bildirdi.

«Biz bul máselemen kúndelikti jumys istep jatyrmyz. Óńirlik TJ bar, aýdandyq aýqymdaǵy, oblystyq jáne respýblıkalyq aýqymdaǵy TJ bar. Sondyqtan, jergilikti atqarýshy organdar sheshimdi jarııalaıdy nemese jarııalamaýy da múmkin», - dedi ol Májilis kýlarynda.