Qýańshylyq: Bıyl Jambyl oblysynda shabyndyqtaǵy shóp ónimdiligi 25% tómendegen

TARAZ. QazAqparat – Jambyl oblys ákimi Berdibek Saparbaevtyń tapsyrmasymen barlyq aýdanda shóp jármeńkesi uıymdastyrylyp, onda bir baý shóp 500 ben 1200 teńgeniń arasynda satyldy,-dep habarlaıdy QazAqparat tilshisi.

Bıyl kóktemgi jaýyn-shashynnyń az bolýy men aýa raıynyń qolaısyzdyǵyna baılanysty, ásirese shóldi aımaqtarda otyrǵan oblystyń birqatar aýdandarynda ornalasqan egistik alqaptary men shabyndyqtarda shóptiń ónimdiligi ótken jylmen salystyrǵanda 20-25 paıyzǵa tómendep ketken.

Oǵan qosa aýa raıynyń ystyqtyǵy da aımaqtaǵy shóp baǵasynyń kóterilýine alyp kelip otyr.

Osyǵan oraı mal azyǵyn ýaqtyly, kórsetilgen mólsherde daıyndap alý úshin ishki resýrstardy tolyq paıdalaný kózdelgen.

Oblys ákimi Berdibek Saparbaev «Birlesip jasalǵan isten bereke tarqamaıdy» atty oblys halqyna aıtqan úndeýinde qajetti shópti jınap alý úshin ishki barlyq resýrstardy paıdalanýdy tapsyrǵan bolatyn.

ıAǵnı, birinshi kezekte mal azyǵyna degen ishki qajettilikti qamtamasyz etýge qamdanyp, shabyndyqtardan, basqa saı-saladaǵy, ózen ańǵarlaryndaǵy jerlerden shóp daıyndaýǵa shaqyrǵan bolatyn.

«Búgingi tańda taý ańǵarlarynan, saı-sala, ózen arnalarynan qosymsha pishen daıyndaý jumystary bastalyp ketti. Bıyl Sarysý, Moıynqum jáne Talas aýdandaryndaǵy Shý, Talas jáne Asa ózenderiniń boıyndaǵy ónim ótken jylmen salystyrǵanda joǵary bolǵandyqtan, iri sharýa qojalyqtarǵa shópti atalǵan aýdandardan oryp alý usynyldy. Budan bólek, keıbir aýdandaǵy sharýalar óz menshigindegi saı-salalardy halyqqa bólip berip otyr. Osylaısha shóp daıyndaý jumystary Jýaly taǵy bir-eki aýdanda uıymdastyrylýda. Sondaı-aq, bizdiń basqarma tarapynan ótken senbiden bastap barlyq aýdan ortalyqtarynda «jem-shóp satý» jármeńkesin ótkizý qolǵa alyndy», — deıdi oblys ákimdigi aýyl sharýashylyǵy basqarmasynyń basshysy Qaırat Amanov.

Mal azyǵy baǵasynyń negizsiz sharyqtap ketýiniń aldyn alý maqsatynda uıymdastyrylǵan jármeńke barlyq aýdanda ótti.

Ondaǵy baǵa da naryqtaǵydan birshama tómen boldy.

Atap aıtsaq, Moıynqum aýdanyna jetkizilgen bir baý jońyshqa – 1000, pishen – 500, bir orama shóp (rýlon) – 3500 teńgeden ótkerildi.

Jalpy jármeńkege 1600 baý pishen, 1000 baý jońyshqa jáne 500 orama shóp (rýlon) jetkizilgen.

Sol sııaqty T.Rysqulov aýdanynda ótken jármeńkede 36 tonna jońyshqa, 56 tonna pishen jáne 28 tonna saban satylǵan.

Sonymen qatar ekinshi orymnyń jońyshqasy 1200 teńgeden, pishen – 900, al saban — 450 teńgeden ótkerildi.

Al, Merki aýdanynda uıymdastyrylǵan jármeńkede jońyshqa – 1400, tabıǵı shóp – 900, saban – 600 teńgeden saýdalandy.

Talas aýdanynda jońyshqanyń bir baýy – 1200, pishen – 800, Jambyl aýdanynda bir baý pishen – 850 teńgeden aınalǵan.

Oblys ákimdigi aýyl sharýashylyǵy basqarmasy bul jármeńkeniń aldaǵy aptalarda da turaqty uıymdastyrylatyndyǵyn jetkizdi.