Qýandyq Shamahaı: Qoǵamnyń barlyq salasyna Alash ıdeıasyn barynsha sińirý kerek

ASTANA. QazAqparat - QR Mádenıet qaıratkeri, fılologııa ǵylymynyń kandıdaty, belgili jýrnalıst Qýandyq Shamahaı Astanada Alash taqyrybyna arnalyp ótken konferentsııa aldynda alashordashylardyń murasyn urpaq jadyna sińirý máselesi týraly aıtyp berdi, dep habarlaıdy «QazAqparat» HAA tilshisi.

«Alash muralary qazirgi tańda múlde zerttelmeı jatqan joq. Zertteý bar. Bul jerde Alash týraly kóptegen eńbekter jaryqqa shyǵyp, iri konferentsııalar ótkizilip jatqanymen ǵylym bir jaqta, shynaıy ómir bir jaqta jatyr. Bir-birimen qabyspaı tur. Óıtkeni, Alash kósemderiniń aıtqan dúnıeleri, ósıetteri men muralary óte ómirsheń. Búgingi zamanda da olardyń eńbekteri óziniń mańyzyn joımaıdy. Ókinishke qaraı, sol tolaǵaı eńbekti shynaıy ómirde qoldaný máselesi aqsap tur. Óıtkeni ǵalymdar óz ortasynda aıtady, jazady, biraq sonymen másele jyly jabylyp jatqan jaǵdaı bar», - deıdi Qýandyq Shamahaı.

Onyń aıtýynsha, Alash ıdeıasyn ǵylymı aınalymnyń aıasynda ǵana emes, ómirge sińirý, ıaǵnı jastarǵa Alash zııalylarynyń ulttyq-demokratııalyq baǵyttaǵy qundylyqtaryn jastardyń boıyna sińirý máselesi áli de bolsa jetpeı jatyr.

«Alash kósemderiniń barlyǵy da Batystyń demokratııasy damyǵan, órkenıetti, ozyq qundylyqtaryn qazaqtyń topyraǵyna sińirýdi kózdedi. Jalpy, memlekettik deńgeıdegi saıasatta da, jýrnalıstıka salasy bola ma - qoǵamdaǵy ǵylymnyń qaı salasynda bolsyn, Alash kósemderiniń qaǵıdalaryn negizge alar bolsaq, onda bizdiń damýymyz, reforma jasaýymyz, jańarýymyz, rýhanı nemese saıası jaǵynan bolsyn barlyǵy basqasha bolar edi. Ókinishke qaraı, áli kúnge deıin keńestik ınertsııadan shyǵa almaı otyrmyz. Áli de bolsa, Alash kósemderine kúdikpen qaraýshylar bar», - deıdi ol.