Qýandyq Bıshimbaevtiń týys inisine taǵylǵan aıyp ózgerýi múmkin
«Aıyptaýshy tarap B. Baıjanovty QR Qylmystyq kodekstiń 434-bóligi boıynsha aıyptaýdan bas tartady. B. Baıjanovty Qylmystyq kodekstiń 432-babynda kózdelgen asa aýyr qylmysty aldyn ala ýáde bermeı jasyryp, qylmys jasady degen aıyppen qylmystyq isti qaraýdy jalǵastyrýdy suraıdy. Qylmysty jasyrý - sot tóreligine qarsy turýdyń bir túri, bul qylmysty ashýdy jáne kinálini jaýapqa tartýdy qıyndatady. Sondyqtan B. Baıjanovqa qatysty aıyptaýdyń jańa tujyrymyn qabyldaýyńyzdy suraımyz», - dedi prokýror Saıahat Nurbekov.
Óz kezeginde jábirlenýshi tarap ótinishhatty qoldady, al B.Baıjanovtyń qorǵaýshysy sýdıadan jańa aıyptaý aktisimen tanysýǵa ýaqyt berýdi surady. Osyǵan baılanysty sýdıa úzilis jarııalady, jalǵasy 2 mamyrǵa saǵat 10:00-ge belgilendi.
Baqytjan Baıjanovqa (Q.Bıshimbaevtiń týys inisi) qylmysty jasyryp, der kezinde polıtsııaǵa habarlamaǵany úshin aıyp taǵylǵan edi.
Aıta ketsek, búgin saǵat 10:00-de bastalýy tıis eks-sheneýnik Qýandyq Bıshimbaevqa qatysty sot otyrysy tústen keıinge qaldyrylǵan edi. Sýdıa onyń sebebin túsindirdi.
Eske salsaq, Qýandyq Bıshimbaevtiń isi boıynsha sot otyrysy buǵan deıin de ýaqytsha toqtatylǵan edi.
Q. Bıshimbaevtiń isi boıynsha sot tergeýi 24 sáýirde aıaqtaldy, endi bas sot otyrysy ótedi.
Qýandyq Bıshimbaevtiń isi boıynsha onlaın-kórsetilim reıtıngi keıbir serıaldardan asyp tústi. Joǵarǵy Sottyń Kommýnıkatsııa bólimi habarlaǵandaı, sot protsesine qoǵam joǵary qyzyǵýshylyq tanytyp otyr.