Qýandyq Bıshimbaevtyń advokaty isti prokýrorǵa qaıtarýdy surady
«Qurmetti sot, Q. Bıshimbaevtyń quqyǵy men bostandyǵyn qorǵaý maqsatynda taǵylǵan aıyptar negizinde jáne aldyn ala tyńdaý satysynda qylmystyq istiń materıaldaryndaǵy Qylmystyq-protsestik kodekske qaıshy tustaryn joıýǵa, prokýrorǵa qaıtarýdy suraımyn. Sondaı-aq, sottyń negizgi sot isin uıymdastyrýǵa jáne onyń shegin anyqtaýǵa quqyǵy joq. Osy oraıda, QR Qylmystyq kodeksiniń 99-baby 2-bóliginiń 5-tarmaǵy jáne 110-baby 2-bóliginiń 1-tarmaǵy boıynsha qorǵaýshyny qylmystyq qýdalaýdy toqtatýdy suraımyn», - dedi advokat Nazken Qusaıynova.
Sonymen qatar, Q. Bıshimbaevtyń qorǵaýshysy eks-sheneýnik áıelin «asa qatygezdikpen óltirdi» degen aıyptaýmen kelispeıtinin aıtty.
Buǵan deıin habarlaǵanymyzdaı, búgin Astanada Qýandyq Bıshimbaevtyń isi boıynsha aldyn ala tyńdaý ótip jatyr. Oǵan QR Qylmystyq kodeksiniń 99-baby 2-bóligi 5-tarmaǵy boıynsha adam óltirý, qasaqana, asa qatygezdikpen adam óltirý, Qylmystyq kodekstiń 110-baby 2-bóligi 1-tarmaǵy boıynsha materıaldyq jaǵynan táýeldi adamdy júıeli túrde uryp-soǵý nemese ózge de zorlyq-zombylyq áreketteri arqyly fızıkalyq jáne psıhıkalyq qınaý faktisi boıynsha aıyp taǵylyp otyr.
Qýandyq Bıshimbaev ózine taǵylǵan aıyptardy moıyndamady.
Eske salsaq, 2023 jyly 9 qarashada Astanadaǵy «Bau» meıramhanasynda burynǵy Ulttyq ekonomıka mınıstri Qýandyq Bıshimbaev óziniń jubaıyn soqqyǵa jyqty. Áıel jedel járdem jetkenshe kóz jumdy.
Munan soń Іshki ister mınıstrligi Qýandyq Bıshimbaevtyń ustalǵanyn rastady.
Ótken jyly 15 qarashada ótken keńeste Memleket basshysy Qasym-Jomart Toqaev Іshki ister mınıstrine Q. Bıshimbaevtiń isin erekshe baqylaýǵa alýdy tapsyrdy.
Aıta ketsek, bıyl 11 qańtarda elorda soty Qýandyq Bıshimbaevty kúzetpen ustaý merzimin 2 aıǵa uzartqan edi.
Bıyl 26 aqpanda Qýandyq Bıshimbaevtyń isi sotqa tústi.
1 naýryzda Qýandyq Bıshimbaevtyń isi boıynsha aldyn ala tyńdaý kúni belgilengen edi.