Qýandyq Bıshimbaevty aqtaýǵa tyrysyp jatqandarǵa sotta baǵa beriledi - Áset Shyndalıev

<p>ASTANA. KAZINFORM &ndash; Bas prokýrordyń orynbasary Áset Shyndalıev isi sotqa túsken Qýandyq Bıshimbaevty aqtaýǵa tyrysyp jatqandarǵa qatysty pikir bildirdi.</p>

Búgin Parlament Májilisinde tilshiler Bas prokýratýra ókilinen isti bolǵan Q. Bıshimbaevty qorǵap jatqan blogerlerdiń áreketi qanshalyqty zańdy ekenin surady.

«Bul áreket tergeýge, iske kedergi sanalmaı ma?», - dep surady tilshiler.

Óz kezeginde Á. Shyndalıev sot otyrysynda bul derekterge baǵa beriletinin aıtty.

Bas prokýratýrdyń orynbasary bul qylmystyq istiń qansha tomnan turatynyn bilmeıtinin málimdedi.

«Qansha tom ekenin bilmeımin, bul isti tikeleı qadaǵalaıtyn prokýror bar», - dedi ol.

Budan buryn habarlanǵandaı, Eks-sheneýnik Qýandyq Bıshimbaevqa qatysty is sottyń qaraýyna jiberildi.

Sottyń aqparatynda aıtylǵandaı, kúdikti Qýandyq Bıshimbaevqa QR Qylmystyq kodekstiń 99-baby 2-bóliginiń 5) tarmaǵy boıynsha adam óltirý, qasaqana, asa qatygezdikpen adam óltirý, Qylmystyq kodekstiń 110-baby 2-bóliginiń 1) tarmaǵy boıynsha materıaldyq jaǵynan táýeldi adamdy júıeli túrde uryp-soǵý nemese ózge de zorlyq-zombylyq áreketteri arqyly fızıkalyq jáne psıhıkalyq qınaý faktisi boıynsha aıyp taǵylǵan.

Eske sala keteıik, 2023 jyly 9 qarashada Astanadaǵy Baý meıramhanasynda burynǵy Ulttyq ekonomıka mınıstri Qýandyq Bıshimbaev óziniń jubaıyn soqqyǵa jyqty degen kúdikke ilindi. Áıel jedel járdem kelgenshe kóz jumdy.