Kýáger: Kúlekbaev aýdandyq ishki ister basqarmasyna «Allah akbar!» dep kirip bara jatty
«18 shilde kúni meniń jumys kezegim bolatyn. Men sol jerde aýdandyq ishki ister basqarmasyna (Almaly aýdandyq ІІB) qarama qarsy sulýlyq salonynda jumys isteımin. Kúndizgi saǵat 11-00-der shamasynda tars etken dybys shyqty. Kólik dóńgelegi jarylǵan shyǵar dep oıladym. Qarasam, turǵan kólikterdiń bári jyldam ketip jatyr. Terezege qarap edim, tars etken daýys qaıta shyqty. Onyń qaıdan shyqqanyn bilmedim. Jas jigittiń kıimderi qap-qara boldy. Aýdandyq ishki ister basqarmasynyń aldynda kólik turdy. Ol sol kóliktiń janynan ótkizý-baqylaý beketine (KPP) qarata oq atyp jatty. Ol sosyn beketten ótip, AІІB ǵımaratynyń ishine qaraı «Allah akbar!» dep aıqaılap kirip bara jatty. Qarýyn aýlada da atyp júrdi. Júgirgen joq. Onda kóp bolmady, 8-9 mınýttan soń shyǵyp, asyqpaı Qarasaı batyr, Dosmýhambetov kósheleriniń qıylysyna qaraı bettedi. Onyń qolyndaǵy qarýdan bárimiz shoshyp kettik. «Bizge jaqyndasa qaıtemiz» dedik... Qoryqqanymyzdan atys kezinde bárimiz jerge jata qaldyq. Joldan Baıtursynov jaqtan kólik kele jatty, ol soǵan otyryp, tez ketip qaldy», - dedi kýáger Tamara Salıhova.
Eske sala keteıik, Almatydaǵy tergeý abaqtysynda Qylmystyq ister jónindegi mamandandyrylǵan aýdanaralyq sotynda Rýslan Kúlekbaevtiń isine qatysty basty sot otyrysynyń ekinshi kúni ótip jatyr. Іsti atalǵan sottyń sýdıasy Erlan Bolatov júrgizýde.